Read turkana Apudunet 7 Bible Online

Apudunet 7 - turkana bible

Apudunet 7

¹Tolimok Ekapolon Akuj Musa tama, “Kesikokini ayong iyong Akuj ani a ekapolon a Misiri. Nakaneni isuruori lokaatokon Aron ngesi loger a ekadwaran kon.

²Tolimok Aron ngakiro daang nakadungok ayong iyong, sodi tolimok ngesi ekapolon atamar kimiek Ngisirael torotokis anakwap keng.

³Nakaneni etiliwori ayong ekapolon lo ichanana noi. Ewouni ngesi akiirar ngakiro kus tani kisuba esi ngakitoodikinet naketubulok alo Misiri.

⁴Nakaneni ayauni ayong eriras loaronon lotunga a akwap a Misiri, sodi epud ngitela a ngitunga kang anakwap kangina.

⁵Eyenunete nabo Ngimisiri atamar arai ayong Ekapolon Akuj, na asubakinea ayong Ngimisiri ngakiro naaronok epud Ngisirael anakwap kech.”

⁶Tosuba Musa ka Aron na adungokinit Ekapolon Akuj.

⁷ Ngirwa lu eruorotor kesi ka ekapolon a Misiri, araakasi ngikaru a Musa ngitomwon-kauni, taraakas ngikaru a Aron ngitomwon-kauni ka nguuni.

⁸Tolimok Ekapolon Akuj Musa ka Aron tama,

⁹“Ani kesaki ekapolon tosuba esi ngakitoodikinet nakailiilok kidodiunotor anikeng, tolimok Aron tolem aburo keng tachakak kwap ngaren ekapolon, nakaneni ilocho aburo toliwor emun.”

¹⁰Sodi toloto Musa ka Aron nia ekapolon tosuba loger lo adungokinitor Ekapolon Akuj. Tachakak Aron aburo keng kwap ngaren ekapolon a Misiri ka ngikasubak etich keng, sodi kilochokin aburo toliwor emun.

¹¹Tanyarau ekapolon ngitunga lukoosok ka ngikasubak, apot ngimurok a Misiri dang tomuroto tosuba ngakiro napei nguna.

¹²Tachakakis kesi ngaburoi kech kwap sodi kilochos ngaburoi toliworos ngimunio. Nakaneni kiliko aburo na Aron nakech.

¹³Sodi torubak ekapolon ichanana noi, towou akiirar ngakiro, loger losek alimokinitor Ekapolon Akuj Musa ka Aron. Ngaakot

¹⁴Sodi tolimok Ekapolon Akuj Musa tama, “Ichanana ekapolon a Misiri noi, ewounit akimiekin ngitunga toloto.

¹⁵Kape nia ekapolon nataparach na elosio ngesi nangolol a Nili. Tolem aburo na elochio toliwor emun, sodi towo iyong alokipetot kidaru ngesi.

¹⁶Tolimok ekapolon kona, ‘Ekapolon Akuj, na erai Akuj a Ngieburaniae, ngesi kameu ayong alimokin iyong atamar kimiek ngitunga keng toloto akipeyore ngesi anariet. Nakaneni iwou iyong akiirar ngakiro keng tani tokona.

¹⁷Tokona bocha ekapolon, ebala Ekapolon Akuj iyenuni iyong atamar arai ngesi ngae kotere ngakiro na esubakini ngesi. Kingolik a, arami ayong ngakipi a aburo kana, nakaneni ilochosi ngakipi toliworos ngaakot.

¹⁸ Etoakete ngikolia, sodi tobos angolol tul tongop Ngimisiri kona emaase ngakipi.’ ”

¹⁹Tolimok Ekapolon Akuj Musa tama, “Tolimok Aron tolema aburo keng sodi kikea alo kidiama ngangololin, ka ngiporotoi a ngangololin, ta ngabwelin na eyakasi Misiri. Eliworosi ngakipi ngaakot. Epete ngaakot lowaitin daang a akwap. Epete tani loboro lu esubitae a ngakito ka lu esubitae a ngamoru.”

²⁰Apot Musa ka Aron tosuba ngakiro na adungokinit Ekapolon Akuj. Kikea Aron aburo keng taram ngakipi a angolol alongaren ekapolon ka ngikasubak etich keng. Kilochos ngakipi daang toliworos ngaakot.

²¹Totoaka ngikolia daang anangolol, sodi tobos angolol tul tongop Ngimisiri kona emaase ngakipi. Pena ngaakot lowaitin daang a Misiri.

²²Tosuba ngimurok dang ngakiro napei nguna kotere amuronot kech. Nakaneni kichananer ekapolon a Misiri noi. Towou ngesi akiirar ngakiro, loger losek alimokinitor Ekapolon Akuj Musa ka Aron.

²³Abu ngesi torei tobongo kai keng, nyekachikina ngakiro nguna.

²⁴Toboka Ngimisiri daang ekwaas a ekipetot esakete ngakipi namatan, kainyo peapedorete kesi akimat ngakipi a angolol.

²⁵Tadaunos ngirwa ngikan-kaarei na aramea Ekapolon Akuj ngakipi a angolol.