Read turkana Apudunet 8 Bible Online

Apudunet 8 - turkana bible

Apudunet 8

¹Ngakidodoka Abu Ekapolon Akuj tolimok Musa tama, “Kape nia ekapolon a Misiri tolimok kona, ‘Kimiek ngitunga kang toloto akipeyore ayong.

²Ani kiwou iyong, erirae ayong akwap kon atoburuchia a ngakidodoka.

³Ilelebunosi ngakidodoka nangolol a Nili. Epote ngakidodoka nguna tolomasi kai kon, ka namaniat na iperi iyong, ta lokitanda kon. Elomarete tani nakais a ngikasubak etich kon ka ngitunga kon, ta lokenoi ka ngapalaranga na imaare ngamugati.

⁴Kiporokinosi iyong ka ngitunga kon, ta ngikasubak etich kon daang.’ ”

⁵Tolimok Ekapolon Akuj Musa tama, “Tolimok Aron kikea aburo keng alokidiama ngangololin, ka ngiporotoi a ngangoloni ta ngabwelin, sodi pot ngakidodoka toburuchiasi akwap a Misiri.”

⁶Kikea Aron aburo alokidiama ngakipi daang, pot ngakidodoka toburuchiasi akwap.

⁷Nakaneni tomuroto ngimurok sodi topedosi kesi dang ayaun ngakidodoka nakwap.

⁸Tanyarau ekapolon a Misiri Musa ka Aron tolimok tama, “Kilipa Ekapolon Akuj tolema ngakidodoka nugu, nakaneni emiekini ayong ngitunga toloto kipeyokis Ekapolon Akuj.”

⁹Tatachu Musa tama, “Alakar ayong kelipakini iyong. Tolim iyong esaa lo kelipakinea ayong iyong, ka ngikasubak etich kon, ta ngitunga kon. Nakaneni itwarakinio ngakidodoka, mam na idongete mati na eyakasi nangolol a Nili.”

¹⁰Tatachak ekapolon tama, “Kilipakinae ayong moi.” Tolim Musa tama, “Asubakini ayong loger lo ibalar iyong, sodi toyenea iyong atamar emam akuj ikwaan ka Ekapolon Akuj, na erai Akuj kosi.

¹¹Itwarakinio ngakidodoka anikon ka ngikasubak etich kon. Emam na idongete mati na eyakasi nangolol a Nili.”

¹²Torotokis Musa ka Aron ani ayei ekapolon a Misiri. Sodi kilip Musa Ekapolon Akuj tolimok atamar tolema ngakidodoka na ayauni ngesi nia ekapolon.

¹³Tosub Ekapolon Akuj loger lo alimokinitor Musa. Totoaka ngakidodoka na ayakasi nakais, ka nalaarin, ta na ayakasi naroatin.

¹⁴Tosenokis Ngimisiri kesi wapei totukokinos, sodi tobos akwap tul.

¹⁵Ani ingolikini ekapolon a Misiri atamar atoaka ngakidodoka, kichananer ngesi nabo noi. Towou ngesi akiirar ngakiro, loger losek alimokinitor Akuj Musa ka Aron. Ngikatuur

¹⁶Tolimok Ekapolon Akuj Musa tama, “Tolimok Aron taram ngalup a aburo keng, nakaneni ibelo apua daang anakwap a Misiri toliwor ngikatuur.”

¹⁷Taram Aron ngalup a aburo keng, sodi kibelei apua daang anakwap a Misiri toliwor ngikatuur, lu aburuchiarete ngitunga ka ngibaren.

¹⁸Tomuroto ngimurok esakete ngikatuur pot, nakaneni tokuruwo. Ayakasi ngikatuur wadaang.

¹⁹ Tolimokis ngimurok ekapolon tamasi, “Akuj asub nugu!” Nakaneni kichananer ekapolon noi towou ngesi akiirar ngakiro, loger losek alimokinitor Ekapolon Akuj Musa ka Aron. Ngichuch

²⁰Tolimok Ekapolon Akuj Musa tama, “Kape moi nataparach elilim kidaru ekapolon elosi nangolol, tolimok ngesi atamar ebala Ekapolon Akuj kona, ‘Kimiek ngitunga kang toloto kepeyonokis ayong.

²¹Kechikichiki iyong atamar ani kiwou iyong, kerirae ayong iyong atomeu ngichuch nikon ka ngikasubak etich kon, ta ngitunga kon. Ilelebunosi ngichuch nakais a Ngimisiri, nabo eburuchiarete ngalup.

²²Nakaneni emiekini ayong ni enyaritae Gochen ni elomito ngitunga kang, nyepete ngichuch inaa. Asubakini ayong nguna sodi toyenea iyong atamar ayong Ekapolon Akuj, asubi etich anakwap kana.

²³Atiaki[8] ayong ngitunga kang ka lukon. Esubakin akitoodikinet nakailiilon naga moi.’ ”

²⁴Tomea Ekapolon Akuj asepich a ngichuch kai a ekapolon ta ngakais a ngikasubak etich keng. Kinyasut ngichuch akwap a Misiri daang.

²⁵Sodi tanyarau ekapolon Musa ka Aron tolimok tama, “Kipeyonokisi Akuj kus ngakipeyos anakwap kana.”

²⁶Tatachu Musa tama, “Nyejoikina kikokini neni kainyo engoyete Ngimisiri na ingolikineta ngibaren lu kipeyoo sua Ekapolon Akuj, na erai Akuj kosi. Ani kilemu sua ngibaren ngulu epeyoto ani kiteeto Ngimisiri, engoyete kesi kimasa sua a ngamoru kitaar.

²⁷Kimiekinae sua atoloto a ngirwa a nguuni nariet akipeyore Ekapolon Akuj, na erai Akuj kosi, loger lo kidungokinitor ngesi sua.”

²⁸Tolim ekapolon tama, “Kemiekini ayong esi toloto akipeyore Ekapolon Akuj, na erai Akuj kus anariet, arai pekilot esi nikalonan. Kilipakinae ayong.”

²⁹Tatachak Musa ngesi tama, “Napei tokona arotokinio ayong, elipi Ekapolon Akuj torotokis ngichuch anikon, ka ngikasubak etich kon, ta ngitunga kon. Nakaneni nyikingal sua nabo sodi kiratak ngitunga nyeelot akipeyore Ekapolon Akuj.”

³⁰Torotok Musa ani a ekapolon a Misiri sodi kilip Ekapolon Akuj.

³¹Tosubak Ekapolon Akuj ngakiro na elipi ngesi. Torotokis ngichuch ani a ekapolon, ka ngikasubak etich keng, ta ngitunga keng. Emam tani eechut epei abu kidong.

³²Nakaneni tani esaa ngolo dang, kichananer ekapolon noi. Towou ngesi akimiekin ngitunga toloto.