Read turkana Apudunet 9 Bible Online

Apudunet 9 - turkana bible

Apudunet 9

¹Akitu a ngibaren Tolimok Ekapolon Akuj Musa tama, “Kape nia ekapolon tolimok atamar Ekapolon Akuj na erai Akuj a Ngieburaniae ebala kona, ‘Kimiek ngitunga kang toloto kepeyonokis ayong.

²Ani kiwou nabo iyong akimiekin kesi toloto,

³kerirae ayong Ekapolon Akuj iyong ayau edeke loaronon lobaren kon lu eraakasi ngangolei, ka ngisikiria, ka ngikaala, ka ngaatuk, ka ngamesekin, ta ngaanei.

⁴Atiaki ayong ngibaren a Ngisirael ka lua Ngimisiri. Emam ibarasit ni erai ika Ngisirael ni etoani.

⁵Atiaku ayong Ekapolon Akuj atamar moi asubea ngakiro nguna.’ ”

⁶Ani enangi akolongit na a ngaarei, tosubak Ekapolon Akuj ngakiro na alimunit atamar asubakini. Totoaka ngibaren daang a Ngimisiri, nakaneni emam ibarasit a Ngisirael tani ipei ni abu totoan.

⁷Kingis ekapolon a Misiri ngakiro na asubakinosi, sodi tolimokinae ngesi atamar emam ngibaren lua Ngisirael tani ipei ni abu totoan. Nakaneni kichananer ekapolon noi towou akimiekin ngitunga toloto. Ngilepunae

⁸Sodi tolimok Ekapolon Akuj Musa ka Aron tama, “Tomudutu ekuron anadui ana erirae ngamudunet ngadi ileleba ngakan. Kiala Musa kidiama alongaren ekapolon.

⁹Epetakin ekuron ngolo akwap a Misiri wadaang loger a apua. Iturupuni ekuron ngolo ngilepunae lu ebulete toliworos ngajemei alotunga ka ngibaren.”

¹⁰Sodi tolemut kesi ekuron towaa alongaren ekapolon. Kiala Musa ekuron kidiama, toruput ngilepunae lu aliworosi ngajemei alotunga ka ngibaren.

¹¹Peapedorete ngimurok akiwo alongaren Musa, kainyo abutakina kesi ngilepunae, loger a Ngimisiri aluche.

¹² Nakaneni kitiliwo Ekapolon Akuj ekapolon a Misiri lo ichanana noi sodi towou akiirar ngakiro, loger losek alimokinitor Ekapolon Akuj Musa ka Aron. Ngamoru a akiru

¹³Sodi tolimok Ekapolon Akuj Musa tama, “Kape moi nataparach elilim taanyu ekapolon a Misiri tolimok atamar ebala Akuj a Ngieburaniae kona, ‘Kimiek ngitunga kang toloto akipeyonokin ayong.

¹⁴Nyerirae tokona ayong ngikasubak etich kon ka ngitunga kon make, nakaneni kerirae ayong iyong dang sodi toyenunea iyong atamar emam itwaan iche ikoni ayong anakwap kadaang.

¹⁵Arai kolong ekea ayong akan kang ayau edeke nikon, ka ngitunga kon, kimunyara esi.

¹⁶Nakaneni ani kona asakea ayong akidodikin iyong agogongu kang, abu ayong kemiek iyong toyar sodi topetakinor ekipur kang nakwap daang.

¹⁷Nakaneni eringa iyong iwoga nabo iwounit akimiekin ngitunga kang toloto.

¹⁸Ani moi enangi esaa lo ikoni lo tokona logo, ayauni ayong ekuwam ka akiru na ngamoru nakaalan. Nyerama akiru na ikoni ngina nakwap a Misiri nakanuan.

¹⁹Tolim tokona atamar ngibaren kon daang ka ibore daang ni eyei nikalapatan, kilomakinae kai. Echakakinosi ngamoru a akiru lotunga ka ngibaren lu imiekinitae anikalapatan nyilomuna tooma, nakaneni etoakete kesi.’ ”

²⁰Toema ngikasubak etich a ekapolon a Misiri ngiche kotere ngakiro na alimuni Ekapolon Akuj. Kilomakis kesi ngikedalak kech ka ngibaren tooma nakais.

²¹Nakaneni apot ngiche nyeekachikis ngakiro na echikichikar Ekapolon Akuj, sodi kimiekis ngikedalak kech ka ngibaren anikalapatan.

²²Tolimok Ekapolon Akuj Musa tama, “Kikea akan kon kidiama sodi tachakun ngamoru a akiru kidiama akwap a Misiri wadaang. Echakakinosi lotunga ka ngibaren, ta ibore daang ni erupunit alokwap.”

²³Sodi kikea Musa aburo keng kidiama, yau Ekapolon Akuj agiro ka akiru na ngamoru, kimileu akwap. Yau Ekapolon Akuj

²⁴ekuwam ka ngamoru a akiru nakaalak, kimileu wadaang. Emam ekuwam loaronon ikoni ngolo lo amin Misiri nakanuan.

²⁵Kimasakinos ngamoru a akiru nibore daang ni ayei nikalapatan anakwap a Misiri, napei alotunga tanang lobaren. Kimasa ngamoru a akiru nginyia daang anaroatin ka aukor ngikito daang.

²⁶ Ewae loa Gochen bon lo alomito Ngisirael ngesi nyerama akiru na ngamoru.

²⁷Tomea ekapolon itwaan tanyara Musa ka Aron tolimok kesi tama, “Asechit tokona ayong nyeesechite Ekapolon Akuj. Kisechit ayong ka ngitunga kang.

²⁸Kilipa Ekapolon Akuj! Kibela sua agiro naga ka akiru na ngamoru. Kalimokinit ayong esi atamar kemiekini toloto, nyeringa nabo esi iboikinosi nege.”

²⁹Tolimok Musa ngesi tama, “Napei apudorea ayong alore, ekeari ayong ngakan kidiama elip Ekapolon Akuj. Edaun agiro ka akiru na ngamoru, sodi toyenea iyong atamar erai akwap aka Ekapolon Akuj.

³⁰Nakaneni ayeni ayong atamar nyikerito iyong ka ngikasubak etich kon Ekapolon Akuj na erai Akuj.”

³¹Kinyasun ngikito lu edonyuunere ngiworui ka ngimomwa kainyo akokito ngimomwa, toturoote ngikito lu edonyuunere ngiworui.

³²Nakaneni nyinyasuna ngakanoi kainyo ekokeenete ekisidi.

³³Torotok Musa ani a ekapolon topudo alore, sodi kikea ngakan keng kidiama ilipit Ekapolon Akuj. Tadaun agiro, ka ngamoru a akiru, ta akiru.

³⁴Ani ingolikini Ekapolon a Misiri na asubakinosi, tosech nabo. Toliworos ngesi ka ngikasubak etich keng lu ichanaka kona palem sek.

³⁵Towou ekapolon a Misiri akimiekin Ngisirael toloto, loger losek alimokinitor Ekapolon Akuj Musa.