Read turkana Yob 1 Bible Online

Yob 1 - turkana bible

Yob 1

¹Ayei kolong itwaan anyaritae Yob, ni alomit nakwap a Us.[1] Akerit ngesi Akuj, angerit naaronok. Arai ngesi itwaan ni atenoono peadiposi ka naaronok.

²Ayakasi ngesi ngide lusapa ngikan-kaarei ka lupesur nguuni.

³Ani alowae a ngibaren, ameat ngesi ngamesekin ngabunge ngakan-kaarei, ka ngikaala ngabunge ngauni, ka ngaatuk abunget apei, ta ngasikiria ngamiae ngakan. Arikit ngesi tani ngikasubak etich lukaalak. Arai ngesi itwaan ni abarit noi alotunga a akide.

⁴Apuyeenete talokookeng a Yob jiik, epukini epei luche akolongit apei, sodi kipeyout tanakaatokech nauni nakimuj.

⁵Arai na edaunotor ngirwa lua apuore, tonyou Yob kipeyo ngakipeyos kotere ipei kech daang esaki akitaleun kesi. Asubeene ngesi kongina jiik kainyo abala ngesi, “Esechito tokona ngon talokookang, kichieno Akuj alotai kech.”

⁶Ani enangi akolongit na alooso talokookeng a ngakujo aanyun Ekapolon Akuj, ayei Ekipe[2] dang kiding kech.

⁷ Kingit Ekapolon Akuj ngesi tama, “Aliwae ibunio iyong?” Tatachu Ekipe tama, “Elat ayong ateneene ama ka ama, erimit akwap.”

⁸Kingit Ekapolon Akuj Ekipe tama, “Ianyunga iyong ekasuban etich kang Yob a? Emam itwaan iche anakwap kadaang ni nyesechit totenoono loger a Yob. Kakerit ngesi ayong nabo nyediposi ka naaronok.”

⁹Tatachu Ekipe tama, “Ikwa ekerit Yob Akuj pas a?

¹⁰Iyoki iyong ngesi ngirwa daang. Ipiarit iyong ibore daang ni etingit ngesi, nabo alalaar ebari lo keng anakwap.

¹¹ Nakaneni ani tokona kitorwaa iyong akan kon tolema ibore daang ni etingit ngesi, kimenyari ngesi iyong toyen!”

¹²Tolimok Ekapolon Akuj Ekipe tama, “Kingolik a, kemiekinea tokona ayong iyong ibore daang ni etingit ngesi, nakaneni wara nyiitap akwaan keng.” Abu Ekipe torotok alongaren Ekapolon Akuj.

¹³Akolongit apei, emujete ngide a Yob akimuj tamaase emuna anawi a lokookeng a Yob aloapolon.

¹⁴Tomotun itwaan nia Yob tolimok tama, “Kitae sua ngamanat a ngimongin, tadakas ngisikiria nginyia alo diyete.

¹⁵Apot Ngisabea[3] kitoremo sua atipei torujasi ngibaren ngulu daang. Aar kesi ngikasubak etich kon daang. Ayong bon abuchun abu alimokin iyong.”

¹⁶Ani eringa ngolo iruoro, todolu loche tama, “Aar akimilea ngamesekin ka ngikeyokok kon daang. Ayong bon abuchun abu alimokin iyong.”

¹⁷Ani eringa ngolo iruoro, todolu loche tama, “Kiremete sua ngajorei ngauni a Ngikalidayo[4] taramasi ngikaala, sodi taara ngikasubak etich kon daang. Ayong bon abuchun abu alimokin iyong.”

¹⁸Ani eringa ngolo iruoro, todolu loche tama, “Emujete ngide kon akimuj tamaase emuna anawi alokookon aloapolon,

¹⁹tokut ekuwam atipei anariet, touko akai ngina taar kesi daang. Ayong bon abuchun abu alimokin iyong.”

²⁰Abu Yob tonyou tochilichili ngiworui keng eriaba. Tolur ngesi sodi tobuburiar kilip.

²¹Tolim tama, “Kedouni kolong itiokang ayong alecher, nabo abongi nikolong abunio alecher. Ekapolon Akuj kolong kainakini, nakaneni ngesi tokona alema. Kimiekisi ekiro keng kipuroe!”

²²Tani na aanyunea Yob ngakiro nguna daang, nyesecha Yob.