Read turkana Yob 10 Bible Online

Yob 10 - turkana bible

Yob 10

¹Kakadaki ayong akiyar kang! Eburakini emam ibore aemit. Alimuni ngakiro nakanomito.

²Alimokini Akuj atama, Akuj, nyikirira kare. Tolimokinae mono iyong ibore nikibolor ngoni.

³Tokona mono a, ejok iyong ichiekiari ka akimenyar etich kon a ilope, sodi kitojoikis ngakiro a ngitunga aluaronok a?

⁴Eyakasi iyong dang ngakonyen na ikote na ngitunga a? Itee iyong dang loger a ngitunga a?

⁵Ekidioko ngirwa kon loger alu a ngitunga a? Ani bo ngikaru kon, ekidioko loger alu a ngitunga a?

⁶Ani nyo ingichitor iyong ngasechesea kang daang? Nyo iripitor iyong ibore ni echwangakini ayong daang?

⁷Iyeni iyong atamar nyasechit ayong. Iyeni tani atamar emam itwaan kayuuni ayong anikon.

⁸Ngakan kon kolong kayeunete ayong katosubut. Tokona,[12] ngakan napei nguna kenyasut ayong.

⁹Toyen atamar kisubuni iyong ayong alochoto. Kibuari cha iyong ayong nabo napua a?

¹⁰Kiyesuni kolong iyong loger a ngakile. Kisipuk anakook a itiokang loger a edodo.

¹¹Iwaakini iyong ngakoyo ka ngamori nakwaan kang, ani erumor toburichia ngakoyo a akiring ka amuny.

¹²Kiinak iyong ayong akiyar ka amina na nyedaun. Ayari ayong ani kichoikinitor iyong ayong.

¹³Nakaneni ayen tokona ayong atamar ngirwa ngulu daang ireat iyong akiwan ayong.

¹⁴Idarit iyong akingolikin ayong asechi, sodi towounea arimakin ayong.

¹⁵Oitiakoi! Na asechea ayong, atoloma lonyas! Ani asubi naajokak, nyekepuruunio. Kainyo kerumito ayong ngileech, ayen ngichan kang.

¹⁶Ani naanyunea naajokak, toloma iyong akirikare ayong loger a engatuny. Isubi iyong tani ngakitoodikinet nakailiilok isaki akiar ayong.

¹⁷Ingichit iyong jiik keyei ibore iche asech ayong. Iatanakin angoit kon anikang jiik. Isakuununi iyong jiik erot eche lo kitijikinio ayong.

¹⁸“ ‘Akuj, nyo kolong kimiekinea iyong ayong kedounio? Arai bo kolong atotoan dang eringa ngitunga nyeanyungara ayong!

¹⁹Napei anaperit kayaar jik naliel, tosub kamam kolong.

²⁰Aapuut ngirwa a akitu kang. Kimiekinae kare! Eangarea mono wadio.

²¹Eringa nyeloto ni nyabongunio nabo. Atolot ni eribokinit kiriono chuch.

²²Erai aribu, ka ngitorubei ta ekurikur eyakasi neni. Ikwaan aribu ka akicha kaneni.’ ”