Read turkana Yob 12 Bible Online

Yob 12 - turkana bible

Yob 12

¹Abu Yob tatachu tama,

²Itemokino, kainyo esi kesi ngitunga, lu iraakasi na itoaketa, edaun aosou.

³Nakaneni aos ayong dang loger kus. Nyijokak esi noi akidwang ayong. Eyeni itwaan ngakiro na ilimu iyong.

⁴Kakianatar ayong tani ngipaalon kang tokona, atarai ayong lo atenoono emam ibore asechit. Nakaneni ayakasi kolong ngirwa lu atachuununea Akuj ngakilipasinei kang.

⁵Emam esi ngichan eyakasi, tani ikoni neni, kikianatar esi ayong. Kiteete esi ayong acheretaara, torubakinito esi kijukarito.

⁶Nakaneni ibooyete ngikokolak ka ngitunga luaronok akaalimon. Tarai ngikilinga kech eraakasi Akuj kech.

⁷Kingita chene ngitieng a moding, kitatamikinete esi. Kingita chene ngikieny, kilimokinete esi.

⁸Kingita ngiborei lua akwap ka lua nganamea, kitatamete kesi esi aosou.

⁹Eyenete ngiborei ngulu daang atamar, Ekapolon Akuj Namerikanyer kisubuni kesi.

¹⁰Eyei akiyar a ibore kadaang nakan keng. Eyei akiyar a itwaan kadaang nagogongu keng.

¹¹Eroanari akit ngakiro loger lo iirea angajep akimuj.

¹²Eosok ngikasukou, tochwaaka lu ebooyete nikooyen.

¹³Tani ikoni neni, Akuj ngesi eos, togogong tarai na echwaana.

¹⁴Na eukorea Akuj, ngae ebongokini akiduk? Ani ngae elachakini itwaan ni aen Akuj?

¹⁵Emini akamu na ewounea Akuj akiru. Ani engauni ngesi ngakipi, pena ngakalel.

¹⁶Egogong Akuj tarai akedwangan. Lu ingalao ka lu ingalaate, eyakasi daang nakan keng.

¹⁷Elemanari ngesi aosou a ngikapolok, ani ngikarikok kitusub ngikabangabangae.

¹⁸Edemanari ngesi ngikapolok apolou kitiliwo kesi ngienan.

¹⁹Itiditeununi ngimurok a Akuj ka ngikajwok.

²⁰Isililingeene lu emunoi, todema ngikasukou aosou kech.

²¹Isurumeene lu eraakasi ngikapolok ngileech, kitasalu ngikilinga a ngikapolok.

²²Isileereununi na eyakasi naribu. Ani na eyakasi ni eribokinit chuch, yau nakicha.

²³Itiliwonori ngesi ngibukui lukajwok ka lu eyenikinitae. Ani erumor kidwang ngesi kesi kinyasu.

²⁴Itabangaani ngesi ngikapolok a ngibukui kangulu. Kimiek kesi esakasakato, ibilerit.

²⁵Itwapitwapete kesi anaribu kimatamatas loger a ngitunga alu ilewat.