Read turkana Yob 13 Bible Online

Yob 13 - turkana bible

Yob 13

¹Toyen atamar engolik ayong nguna a ngakonyen kang, eira ayong a ngaki kang a ilope, ayen lokojokon.

²Nguna iyenete esi, ayeni ayong dang. Nyijokak esi akidwang ayong.

³Nakaneni asaki ayong eruoro ka Akuj Naationon, meere ka esi. Asaki ayong atopega ka ngesi kotere ngakiro kang.

⁴Irapito esi abangaanut kus a alioko. Ikote esi ngimurok lu nyitedekuunete itwaan.

⁵Arai bo kililinga chek dang. Ketamar kori iosok!

⁶Kiira ngakiro na alimuni ayong.

⁷Nyo iruorotor esi alioko? Ibalasi esi kori ingarakini aliokon Akuj a?

⁸Isakete esi aikin Akuj a? Ipedorete esi akiwo anitubet ngakiro toikis ngesi a?

⁹Keloma Akuj angichit ngakiro kus, esibit esi epedori ngesi aanyun ibore idio ejok anikus a? Esibit esi ipedorete akingalare Akuj loger lo ingalaata ngitunga a?

¹⁰Kikilakini ngesi esi erai kitiakito esi ngitunga imunonito.

¹¹Kitubuli esi agogongu keng.

¹²Ngapasiyek ngakamatak kus loger a ekuron. Ikote ngakiro na igaate esi akigare a echoto.

¹³Kililinga kimiekinae eruorik. Tosubakin cha ngakiro na esubakinosi.

¹⁴Ajali ayong[13] akiyar kang.

¹⁵Emam ayong ibore egieno. Emam ngakiro tani kaar Akuj ayong. Eruorikini ayong ngakiro kang kiira ngesi.

¹⁶Apedori ayong tani ayuun kotere atitinyu kang. Kainyo emam itwaan aronon epedori aweikin Akuj.

¹⁷Topupok tokona ngakiro na esisauni ayong. Todeta akit kiira ngakiro na alimuni ayong.

¹⁸Asadit ayong, asaki akisisaun ngakiro kang, kainyo ayeni ayong atamar nyasechit.

¹⁹Akuj, ibunit ayong akirirare ayong a? Ani kibunit iyong akirirare ayong, kimiekinae eliling sodi atotoan.

²⁰Eyakasi ngakiro ngaarei kelipit iyong. Ani kiinak iyong ayong, nyepungar ayong anikon asaki akiduk.

²¹Tojongo kare akirirare ayong. Wara nyikimunya ani kitubulio.

²²Kiruorik mono Akuj, atatachu ayong ngakiro kon. Kori kimiekinae ayong robo eruorik mono, tatachu iyong nakang.

²³Nyoni asechit ayong? Nyoni echwangakinit ayong? Kerirakinitae ayong a ngakiro kaanu?

²⁴Nyo kibongokinitor iyong ayong akau? Nyo kitusubunitor iyong ayong emoit kon?

²⁵Nyikitoem kare, ekoni ayong akuyen. Ekoni ayong akasirimait nakoonon na ekutakinit ekuwam.

²⁶Itoronit iyong noi ngakiro nakiriraa ayong. Imarunit iyong tani ngakiro nakolong asubi ayong eringa adit.

²⁷ Ienikinit iyong ngiriko nakejen kang. Iseme iyong elote kang daang. Iripi iyong tani ni ichiekete ngakejen kang.

²⁸Kinyasun itwaan loger a ibore ani abosia, loger a eworu alo irikari ekatapan.