Read turkana Yob 14 Bible Online

Yob 14 - turkana bible

Yob 14

¹Epalag itwaan daang nikolong edouni aberu. Ekidioko ngirwa keng eraakasi ngika ngichan.

²Epukiari itwaan loger a aturot, ani erumor tooniyo atipei. Ekeri itwaan loger a etorube tongopia.

³Tokona mono Akuj a, nyo ikienyikinitor iyong ngesi? Nyo irikitor iyong ngesi nitubet ngakiro? Isaki atamar totub ngakiro keng a?

⁴Emam ibore italeuno ni ebuni anibore ani nyitaleuno ikoni itwaan.

⁵Etiakunitae etiae a eboyor keng kolong sek, ka etiae a ngilapio keng. Igerok iyong ngikukuorin lu nyejoikinit ngesi ilami.

⁶Tojongo akitere itwaan ngini,[14] topedorea ngesi alakar, loger lo elakaror ekasuban etich einakinio ngaropiyae keng.

⁷Eyei ibore igieno tani ekitoe lo etuborio. Erupuni ngesi nabo kimineau.

⁸Tani kemojongeta ngaten na alokwap, totoanik atorom keng nalup,

⁹ani eriamuni ngakipi, imineauni loger a ekitoe alo aringa erupuni.

¹⁰Nakaneni itwaan na etoanea, esal keng ngesi ngolo. Ani na etoanea ngesi, eringa nabo eyei aliwae?

¹¹Eger lopei etubotor ngangololin, ka eger lopei eonioto nganamea,

¹²ikoni itwaan dang neni. Nainapakinor ngesi nalup, nyenyouni nabo jik. Tani kengopia adis, nyerianguni ngesi anaju jik.

¹³Arai bo kidaa ani eyakasi ngikatoak dang! Tanang anyunyura kon edaun. Ani erumor toseu ngirwa lu kitamunea ayong.

¹⁴Ani ketoana itwaan a, eyaruni a? Kedar ayong iyong ngirwa a etich kang daang, tanang kalachakinio ayong.

¹⁵Ani ekisidi kanguna, kinyarae iyong ayong ekii. Talakar iyong kianyungari ayong, lo arai esubuna kon.

¹⁶Toliwor iyong imari akikalamikinet kang daang, nakaneni toliwor nyingichingichi iyong ngasechesea kang.

¹⁷Kirimakini iyong ayong ngasechesea kang tachada. Ikisari iyong ngakiro naaronok daang asub ayong.

¹⁸“Epete ngirwa lu eukorotor ngimoru, sodi tolemarae ngatabab anipalem esipotor.

¹⁹Ikisete ngakipi ngamoru. Emiatari akiru nakaalan ngalup, sodi tongopik itwaan ibore ni eyarea.

²⁰Idwangi iyong itwaan ngirwa daang, tolot ngesi. Ebilakini ngesi ereet keng totoan.

²¹Ani erimae talokookeng, nyeyeni ngesi, kori nyelimokinio ngesi tani na irumeta kesi ngileech.

²²Eyeni ngesi apipilu na akwaan keng bon, kigor tosutonok kotere ngesi ilope bon.”