Read turkana Yob 15 Bible Online

Yob 15 - turkana bible

Yob 15

¹Ani erumor tatachak Elipas lo abunit alo Teman Yob tama,

²Yob, eraakasi ngakiro kon ngaanyukae! Ngaanyukae ngakiro kon!

³Nyiruoro itwaan nikooson loger ngolo. Kori nyepega a ngakiro anapasiyek loger logo.

⁴Nakaneni ipalik iyong akerit Akuj, sodi kimenya akilipit Akuj.

⁵Aronis kon kitatami iyong. Isaki iyong akiduk alokiruor alokooson.

⁶Ngakiro kon kiriraate iyong, meere ayong. Kirirae iyong angajep kon.

⁷Esibit iyong kori iyong irai lo ekingaren kidounio a? Iyei kolong iyong na asubea Akuj ngimoru a?

⁸Iirarit kolong iyong ngakiro na areat Akuj a? Esibit anikon iyong bon irai itwaan nikooson a?

⁹Emam ibore ni iyeni iyong ni nyikiyeni sua.

¹⁰Kitatama sua aosou alokasukou alu a ngakorwo. Ngikasukou lu amojongito akidwang apakon.

¹¹Ikwa nyikitemokino iyong akisienguno a Akuj a? Kori nyikijoikinito iyong ngakiro nakisubea ngesi iyong a ajokis keng?

¹²Nakaneni ilakara iyong, kipochonokini sua ngakonyen ingoit.

¹³Ingoikinit Akuj iloma akiruor ngakiro naaronok.

¹⁴Eyei itwaan erai ni ikiuna? Eyei itwaan nikolong edouni aberu ni etenoono ani a Akuj a?

¹⁵Kingolik a, nyemuno Akuj tani ngimalaikae keng lu italeuno. Nyikiuna tani kesi alongaren keng.

¹⁶ Emasi itwaan naaronok itisibit ngakipi. Erai itwaan ni ileleba naaronok ni ibatara.

¹⁷Topupok tokona Yob, Katolimok na ayeni.

¹⁸Ketatam ayong ngikoosok ngakiro na iteni, nakolong etatamete taaapakech kesi, emam ngakiro emunono kesi.

¹⁹Amam ngitunga a akwap a ache lu ayakasi nakwap kech. Amam ikebataran kesi Anakuj kech.

²⁰Itwaan niaronon ni ichiekiarit luche, eriab ngirwa daang lu eyarea ngesi.

²¹Iirari ngesi ngitoilio lu itubulete. Eremete ngesi ngirukooi esaa lo ebalar ngesi kori ebooyi niajokon.

²²Nyenupit ngesi atamar abonguni anaribu, kainyo idarit akiar ngesi.

²³Idarito tani ngataruk[15] akinyam akiring keng. Eyeni atamar kaapiki ngesi aribu.

²⁴Itubulito ngesi ngichan ka nikaapilan. Itubulito loger a ekapolon alo enyounit lojie.

²⁵Ngakiro nguna kesi eanyuni itwaan ni isiganakini Akuj akan, sodi tonger ngakiro Anaationon.

²⁶Epeuni nikeng kibirun etingit aupwal a akan.

²⁷Kainyo ikileenikinit ngesi, nabo erai itwaan a ngikilinga.

²⁸Elomi itwaan ngini lorerea lu eraakasi alaireng. Elomi nakais nakolong amatarotor ngikulepek. Nakaneni inyasuni ejie ngirerea ngulu ka ngakais .

²⁹Ekidioko ngirwa ebaritor itwaan ngini. Emam ibore keng ni erubi. Engopiari tani etorube keng.

³⁰Nyebuchar ngesi anaribu ana ebunit nikeng. Ikokini ngesi ekitoe lo inomio ngaten keng a akim, tokutanari ekuwam ngatur[16] keng.

³¹Ani kebangaana ngesi, elomari amuno naaronok, Toliwor naaronok eraakasi ebachit keng.

³²Ani eringa esaa keng nyitemokino, eoniori[17] ngesi, loger a ateni ana nyimineauni nabo jik.

³³Ikokini ngesi emusabib lo erarauni ngamusabib naajonak. Ikokini ekitoe a akimiet lo erarauni ngatur keng.

³⁴“Engopete ngalesea alu nyekerito Akuj. Enomiari akim ngawiyei alu ipotonorete ngaropiyae nadiaket ngitunga.

³⁵Ereto ngitunga ngulu ngichan, kirokete ngakiro naaronok. Ileleba engalas lotai kech.”