Read turkana Yob 16 Bible Online

Yob 16 - turkana bible

Yob 16

¹Sodi tatachak Yob ngesi tama,

²Eira ayong ngakiro na ikote nguna nakaalak. Akisililing nakisililingeta esi ayong erai ariaba naaronon anikang.

³Irubakini iyong ekiruor jik a? Nyo kipiipiakinit iyong isakea ekiruor jiik?

⁴Arai tarai iyong ayong, nabo atarai ayong iyong, keruor ayong ngakiro daang na tokona iruoro iyong. Keroku ayong ngakiro daang nakesuruori esi, sodi eikiik akou kang kotere aosou.

⁵Kesuruor ayong iyong ketenik, ketubo angajep kang ibore ni kipipilikinit iyong.

⁶Nakaneni emam ibore eyauni ekiruor kang, kori nyitupupokini akililing kang nikaapilan.

⁷Akuj, kitubur iyong ayong. Imiek iyong ngitunga a awi kang eario.

⁸Kirum iyong ayong kiting a agogongu. Irai iyong emoit kang. Edong ayong ngamunyin ka ngakoyo make. Ebalasi ngitunga kori kekaritor ayong ni asechitor.

⁹Anyilinyilaa Akuj nginerin kang engoit. Kapochonokini ngesi ayong ngakonyen engoit.

¹⁰Kakianatar ayong ngitunga. Keriamito kesi ayong a ngajorei, kebapabapata ngamatengen.

¹¹Kepoto Akuj ayong kainaki ngitunga luaronok.

¹²Ebooyi kolong ayong akaalimon, nakaneni katorwakin ayong Akuj emosiring katonyilinyilaa. Kesikok Akuj ayong ibore ni echakachakao ileletoi.

¹³Kagumit ayong a ngimalea alowaitin kadaang. Kechumete ayong ngimalea ngulu katowan, tani kikok neni emam ngesi ngisien anikang.

¹⁴Kawaneene ngesi ayong jiik. Karemeene ngesi ayong enyunyura, loger a asiger ana ekoporito ngikerep.

¹⁵Egoro ayong anapit ngikuniae, sodi eboikin napua nege abanganiarit.

¹⁶Arengeta ngakonyen kang kotere akigoro. Abuoto ngakonyen kang eriam ngitorubei.

¹⁷Nakaneni nyarai ayong ekademan, nabo ikiuna akilip na elipitor ayong Akuj.

¹⁸Wae akwap, nyiiwa naaronok kasubere ayong! Nyikisililing kare ayong, asaki ayong katosubakinere na eriyan.

¹⁹ Eyei ekaanyunan kang nadis ni elimuni ngakiro kang katoik ayong.

²⁰Kemenyarito ayong ngipaalon kang. Atoyae ayong ngakiyo ani a Akuj.

²¹Asaki ayong itwaan idio todiak Akuj kotere ayong. Loger lo ediakar itwaan kotere lopae keng.

²²Adaunet a ngikaru a ngidikidio isidiunosi, alosi ayong ni nyabongunio nabo.