Read turkana Yob 17 Bible Online

Yob 17 - turkana bible

Yob 17

¹Aapuu esal a akiyar kang. Emam ayong tani kona eangakini. Kedarit ayong aliel kang.

²Etee ayong a ngakonyen kang eger lo kakianar itwaan daang.

³Akuj, eruoro ngakiro na iteni, tonup ngakiro kang. Emam itwaan iche iikini ngakiro na alimuni ayong.

⁴Igol iyong ngitamen kech nyeeyan ngakiro kang. Nyiicham kesi tokona kedwangete ayong.

⁵Epedori itwaan akimod lopae keng kotere ngaropiyae, sodi taanyut ngide keng ngichan kotere ngakiro nguna.[18]

⁶Ketiliwo ngesi ayong lo kakianatar ngitunga, apot ngitunga ngulu akimoanakin ayong loreet.

⁷Ekot ariaba kang akitumudukan ayong. Ekokis nginerin kang daang ngitorubei.

⁸Eteriangakis ngakiro nugu ngitunga daang lu eteniyete. Ani lu nyesechito, akadakis ngakiro a ngichan kang.

⁹Erubakinete lu eteniyete iwapito elote kech. Ani ni ikiuna, isikokin togogonger.

¹⁰Nakaneni ani kepot kesi daang towaa alongaren kang, kemam tani epei kech aanyuni ayong erai itwaan nikooson.

¹¹“Adaunosi ngirwa kang, enyasun ngakiro na asaki ayong akisub. Emam ibore eringa ayong egieno.

¹²Abe ebalasi ngipaalon kang erai akwaar apaaran. Ebalasi kesi aapuu akicha, nakaneni ayeni ayong atamar edongi ayong naribu.

¹³Ni egieno ayong ngesi ni eyakasi ngikatoak. Neni ngesi enapakin ayong, atoper ani eribokinit.

¹⁴Ani kalimok ayong aliel atama, ‘Irai iyong apakang.’ Ani erumor atolimok ekurut atama, ‘Irai iyong itiokang,’ kori ‘Irai iyong nakaatokang.’

¹⁵Nyaani tokona akigieno kang? Ngae eanyungari na egieno ayong?

¹⁶Nyikiruki ayong ka akigieno na alosio lokatoak.”