Read turkana Yob 18 Bible Online

Yob 18 - turkana bible

Yob 18

¹Ani erumor tatachak Bilidad lo abunit alo Chua Yob tama,

²“Yob, nyililingi kolong iyong jik a? Arai topuponokini iyong, kisuruor sua iyong.

³Nyo kitabangaanitor iyong sua kwa ngamesekin?

⁴Inyilinyila iyong bon a angoit kon. Ibala iyong kori idongi akwap erai alaireng, kori isiyotoori Akuj ngimoru ani ingoitor iyong a?

⁵Itudungeo ataa a itwaan aniaronon. Nyenokuni asarae a ataa kangina jik.

⁶ Eribokini akicha na eyei kai keng. Ani ataa na inenekino, edunge.

⁷Agogong kolong ngakichieket keng, nakaneni iteriterosi tokona. Ani ngakiro na ereat ngesi ilope, edakarete ngesi.

⁸Elosi ngesi ilope kichiak epuute, tachakakin ngesi nakipany.

⁹Erwakin eloit ngatitiny keng tokod.

¹⁰Idaikinitae atachit lorot. Ewaakin eloit ni itori ngesi.

¹¹“Itubulitoe ngesi alowaitin kadaang. Ebulit ngesi ani elosi kadaang.

¹²Abarit kolong ngesi, nakaneni angopiki tokona akimuj. Erukito ngesi ka ngichan.

¹³Erika edeke loaronon akwaan keng korot, etobosia ngakan ka ngakejen keng.

¹⁴Alemario ngesi anawi ana kolong egieno, kiriarae ni eyei ekapolon lobe Akitu.

¹⁵Epedori tokona itwaan cha daang akilom nawi keng, erai kewatakin akibirit kitoseg.

¹⁶Aoko ngaten keng na alokidiama ka na alokwap.

¹⁷Adaun ekipur keng anawi ka moding. Emam itwaan eringa itamunit ngesi.

¹⁸Itwarakinio ngesi anakwap ana eyareta ngitunga. Itwarakinio anakicha tolot naribu.

¹⁹Emam ngesi ngide kori ngalesea. Emam ekeruman awi keng.

²⁰Napei alo kide tanang too, daang lu iirarete ngakiro keng, imungumungakinete ngakies tamaranikis ebulit.

²¹Ngakiro na ikote nguna eanyunete ngitunga luaronok, lu nyekerito Akuj.”