Read turkana Yob 19 Bible Online

Yob 19 - turkana bible

Yob 19

¹Ani erumor tatachak Yob tama,

²“Kiboliatar esi ayong a ngakiro kus tanang ori?

³Kirata esi ayong ngaraset nakaalak, nakaneni nyikitimi esi tani eger lo kirasitotor esi ayong.

⁴Tani kasechit ayong dir a, nyo kipipilikinit esi?

⁵Esibit esi ijokak esi noi akidwang ayong. Itamito esi atamar idodiunito ngichan kang atamar asechit ayong dir.

⁶Nyiteete esi atamar Akuj ngesi asub nugu a? Apetaki ngesi eloit lo kesurumea ayong.

⁷Angerit ayong ngakiro nakaremitor Akuj kongina, nakaneni emam ikapupokinan. Emam ikeiraran atamar asaki ayong katosubere na eriyan.

⁸Agol Akuj erot kang, emam ayong kona etori neni. Arap ngesi erot kang a aribu.

⁹Alema ngesi ebari kang daang kinyasu ekipur kang.

¹⁰Kenyasu ngesi ayong alowaitin kadaang kamunya. Ani akigieno kang, adita ngesi loger a ekitoe.

¹¹Engoit Akuj, etililit ayong ngesi. Ketisibit ayong emoit keng.

¹²Ameu ngesi ngasigerea keng akitijwore ayong. Aboka kesi ngapanya eriam awi kang.

¹³“Achada Akuj talokaatokang anikang. Aliwor ayong itwaan nigela ani eyakasi ngipaalon kang.

¹⁴Kachakasi ayong ngiyenet kang ka ngipaalon.

¹⁵Ngipeyok lukolong epeyoununi ayong nawi kang, achadarosi anikang. Ngakasubak etich kang, ketusubut ayong itwaan nia akwap anache.

¹⁶Na anyaraa ayong ekasuban etich, nyikii. Tani kemaima ayong ngesi atamar kengarak ayong.

¹⁷Nyenaikini aberu kang ebose a ngikumes kang. Nyeapuunete talokaatokang diyete kang.

¹⁸Kemenyarito ayong tani ngide luuchik, keruorotor ayong napei kengolikineta.

¹⁹Akadakinit ayong ngipaalon kang daang luminat. Kanyoikis ayong lukolong amina ayong noi.

²⁰Emidiikin amuny kang nakoyo kang. Edit ibore ketubuchi ayong akitu.

²¹“Esi ngipaalon kang, kisienoi ayong! Kainyo kawan Akuj ayong.

²²Nyo kiboliatar esi dang ayong loger lo kaboliar Akuj? Eringa esi nyeburuna aboliar akwaan kang a?

²³Arai bo toyei ikegiran ngakiro kang dang, kigir cha nakitab!

²⁴Kori kichietae ngakiro nguna nataaba, ani erumor kigirae torubeta jik[19]

²⁵Tani ikoni neni, ayeni ayong atamar eyari ekayuunan kang. Esal kadaang, ebuni ngesi katoik ayong.

²⁶Tani kinyasu edeke amuny kang kerumor, aanyungari ayong Akuj a akwaan kang.

²⁷Aanyungari ayong Akuj ibakit alowae kang. Nyeliwor nabo ngesi na egelaana anikang. Alilimiyo ayong!

²⁸Ani kitamasi esi, ‘Kirubakini aboliar ngesi.’ Ipotu esi tasakut ibore ni kiboliatar ayong.

²⁹Nakaneni tokera tokona ekileng lo etiyaunitae kotere anyunyura a Akuj, sodi kirira akisech toyeneta atamar ebunit eriras.”