Read turkana Yob 20 Bible Online

Yob 20 - turkana bible

Yob 20

¹Abu Sopar lo a emachar a Naamas tatachak Yob tama,

²“Kesibusikis ngakiro nugu. Ngakiro nguna kesi asakea ayong akitach ngakiro kon atipei.

³Kirasit iyong ayong a ngakiro ana ilimu, nakaneni ayeni ayong eger lo atachea ngakiro kon.

⁴“Iyeni iyong dir atamar kolong kanuan, napei kolong ewaakinere itwaan nakwap,

⁵emam itwaan niaronon ni alakar akooyen.

⁶Tani kipuruun ngesi noi tanang ekipur keng nadis. Kori tani keoyaar noi tatap akou keng adis,

⁷ekutario ngesi nialonan loger a apua. Lukolong ayenete ngesi, ingitasi, ‘Ekoe, nyaai ni kelot?’

⁸Engopiari ngesi loger a ngakiro ana irujao, loger a akisingolikinet a akwaar, nyeanyungar nabo jik.

⁹Engopi ngesi ani kolong sek alomit.

¹⁰Esakete ngide keng atamar kitachamut ngikebootok. Ibore daang ni aanyuni ngesi, ebuuni a ngakan keng.

¹¹Akwaan keng nakolong adwarunit akilikili, eliwor apua atipei.

¹²“Tani kebob aronis anakituk a itwaan aniaronon, tani kidait ngesi alokwap angajep keng,

¹³tani kekuruworit ngesi aisikin, torubak iwaakinit nakituk keng,

¹⁴nakaneni edwarer na enangea nakook, edwarer topipiler loger a akisierit a emun.

¹⁵Elekuni ekabaran ebarit lokolong akokoiari. Ebuuni Akuj ebari anakook keng tani kilikorit ngesi.

¹⁶Ikoni ibore ni ilikori itwaan niaronon akisierit, eari ngesi loger lo kikonyea emun lo kingedari.

¹⁷Nyeyari ngesi taanyunga ngangololin a akimiet a ngikito kori ngingololin lu eleleete ngakile ka akimiet a ao.

¹⁸Eisikini ngesi ibore daang nikolong aanyuni a ngakiinyir keng. Nyeyarea ngesi ebari keng,

¹⁹Kainyo echiekiari ngesi ngikebootok tajamua. Abu ngesi kidoko ngitunga ngakais nakolong nyeduko ngesi.

²⁰“Emam ibore itemuni etereku keng.

²¹Esaa lo imujea ngesi, emam ibore epiyanuni, nakaneni asalu tokona ebari keng.

²²Ani eanyuni ngesi ibore daang ni esaki, etikokinosi ngesi ngichan luaronok.

²³Kimiek ngesi tanyam ibore cha daang ni esaki! Irirae Akuj ngesi engoit tonyunyurikin.

²⁴Ipungar ngesi esaki nyakaar ekileng a asuat anakirion, nakaneni egumi ngesi emal a asuat ananyang.

²⁵Egumi emal ngesi toporu kayaaye, toleleut ngaakot keng anangajep a emal alo ewaliwali, tobul ngesi tamaranik.

²⁶Kinyasun ibore daang nikolong adatunit ngesi. Akim na nyinokakina itwaan enomi ngesi ka ngitunga a awi keng daang.

²⁷Isileereuni adis akisech a itwaan kaen, sodi kiruor akwap ngakiro keng.

²⁸Inyasunio ebari keng daang akolongit na anyunyura a Akuj.

²⁹“Akiroit ipakakinitae ngitunga luaronok ngina, akiroit ngina etiakakinit Akuj kesi.”