Read turkana Yob 21 Bible Online

Yob 21 - turkana bible

Yob 21

¹Sodi tatachu Yob tama,

²“Topupokisi tokona lokojokon ngakiro na esisauni ayong, ibore abala esi kisianguneta ayong ngini.

³Kiapakinae kare kimiekinae eruorik, ani arumori ekiruor, ipedorete akianar.

⁴“Meere ngitunga kiburaa ayong, ngakiro nguna kesi ebunyar ayong.

⁵Kingolikinae ayong. Ikwa nyikitalarit esi eboyor kang tobuna ngakituk a?

⁶Na etamarea ngakiro na asubakinosi anikang, erakar, sodi atamaranik kabulit.

⁷“Nyo imiekinitor Akuj ngitunga luaronok eyarete? Nyo imiekinitor kesi emojongete eringa ngikilinga eyakasi?

⁸Ibooyete kesi taanyungasi ngide kech isikokinosi, kingolikis tani ngitatae kech epolounete.

⁹Nyeyauni Akuj ngakiro naaronok nawiyei kech. Nyibooyete kesi ebulit.

¹⁰Edwarunito ngimongin kech jiik. Euriyeenete ngaatuk kech daang, nyiyecheenete.

¹¹Ematarosi ngide kech toboliata loger a ngimesekin,

¹²kichurokis eruosi ngagitae ka ngibunei.

¹³Ibooyete kesi eboyor kech ejakaanito, totoaka emam ni eriabi kesi.

¹⁴“Elimokinete ngitunga luaronok Akuj tamasi, ‘Kimiekinae sua! Nyikisaki sua akiyen ngakiro na isaki iyong aloboyor kosi.

¹⁵Akuj Naationon ngesi ngae kisubea sua etich keng? Nyo niajokon kianyuni sua erai kilip ngesi?’

¹⁶Itamito kesi atamar kianyuni naajokak kotere ngikilinga kech a ngikulepek, nakaneni nyachamuni ayong ngakiro na itamete kesi nguna.

¹⁷“Ekoe a, anikolongit etudungeere ataa a itwaan aniaronon? Ekoe a, eyei itwaan niaronon idio ni ariamu ngakiro naaronok a? Ekoe a, eyei kolong ni eriraa Akuj ngitunga luaronok engoit,

¹⁸tokutana kesi loger lo ekutanarea ekuwam nginyia, kori loger a apua ana ekutarit ekuwam a?

¹⁹“Abe ibalasi esi irirae Akuj ikoku kotere akisech a apakeng. Meere kongina! Kimiekisi Akuj kirira ngikasechak make. Kimiek ngesi kidodiu atamar asubi kongina kotere ngasechesea kech.

²⁰Kimiekisi ngikasechak kitiro eriras kech a ngikulepek. Kimiekisi kesi kimadasi anyunyura a Akuj Anaationon.

²¹Na edaunotor ngirwa a itwaan a, ekachit ngesi kelakara ngide keng kori kemam a?

²²Epedori itwaan akitatam Akuj na irirae tani lu eyakasi nadis a?

²³“Etoani iche ibooyi anajako, elakara lokojokon ibooyi akaalimon,

²⁴etumit ebutur, ileleba akimiet nakoyo keng.

²⁵Etoani iche eriaba lokojokon, emam ibore ajokon aanyu.

²⁶Nakaneni etoakete kesi daang tonukae. Tobutakinos daang ngikur nawat.

²⁷Ayeni ngakiro na itamito esi, ka ngakiro na itukitotor esi akibatar ayong.

²⁸Ingitasi esi ibalasi, ‘Nyaani tokona akai a ekapolon, itwaan nikolong asubi naaronok?’

²⁹Ikwa nyieana esi ka ngitunga lukalotok a? Nyiyenete esi ngakiro na isisaenete kesi na ebongunioto a?

³⁰Atamar ebuchar itwaan niaronon akolongit na akitu, eyuun ngesi akolongit na engoitor Akuj.

³¹Emam itwaan irirae itwaan niaronon kori etachi ngesi kotere ngakiro daang na asub ngesi.

³²Nailepoleporere ngesi akinuk, iyokiyo aliel keng.

³³Iwapuunete ngitunga lukaalak ngesi anaabor, ani ngiche lu emam kona imarunio, ingarenikinete ngesi. Tani ngalup na enukere ngesi, emudanakinio tooma naliel iyapakinitae wadio.

³⁴“Tokona a, ipedorete esi akisililing ayong a ngakiro pas a? Ngakiro na itachunito esi daang eraakasi alioko.”