Read turkana Yob 22 Bible Online

Yob 22 - turkana bible

Yob 22

¹Abu Elipas lo abunit alo Tema tolimok Yob tama,

²“Ekoe, eyei itwaan epedori akingarakin Akuj a? Iteni ingarakin itwaan nikooson bon.

³ Eyei ibore eanyuni Akuj Naationon ani isubea iyong na iyookino a? Eyei erot ingarakinitor iyong ngesi ani ijokia?

⁴Erai ni ikeritor iyong Akuj ngesi kikilanakinea ngesi iyong, sodi kilomak loriras a?

⁵Meere kongina, erai ni isechitor iyong lokojokon. Erai kotere ngakiro naaronok daang isub iyong.

⁶Ani kona isakea iyong lokaatokon tatach ngaropiyae nakolong aari anikon, ibu iyong tolema ngiworui keng daang, kimiek ngesi elienyi.

⁷Imiki kolong iyong ngakipi ngitunga lu aburunit, kimik akimuj ngitunga lu anyamit akoro.

⁸Ikwa erai akwap aka ngitunga alu ikileenikinit make a? Ikwa erai iuriaritae kotere lukidio eminae make a?

⁹Iwouni iyong akingarakin ngapuseru. Ikokoi iyong ngiboro a ngikokiok ka aboliar kesi.

¹⁰Kotere ngakiro nguna, kiriamito iyong ngiloken alowaitin kadaang, kitobul iyong atipei.

¹¹Erionik akicha kon nyianyungarea iyong. Kiburuchia iyong akaale.

¹²“Iteni dir, ibooyi Akuj alokidiama adis. Erounit ngikanyer daang alokwap, tani keyakasi kesi kidiama noi.

¹³Tani ikoni neni, ingita iyong ibala, ‘Nyo eyeni Akuj? Epedori ngesi akirirare lu eyakasi naribu a?’

¹⁴Itamit iyong atamar erapete ngesi ngidowon tojongo akitere, esaa lo itorio lokukuor a akwap ka adis a?

¹⁵“Isaki iyong akiwap ngirotin lukolong ewapete ngitunga luaronok a?

¹⁶Abu akaale tolelea kesi, eringa tani ngirwa kech nyenanga.

¹⁷Elimokinete ngitunga ngulu Akuj tamasi, ‘Koto kane. Anukiro kisubakinea sua Akuj Naationon?’

¹⁸Tani ikoni neni Akuj ilelebi ngakais kech ngiboro luajokak. Nyapedori ayong akiyen ngakiro na itamete ngitunga luaronok.

¹⁹Elakarosi ngitunga luajokak, ani lu etenooko tokienata na ingolikineta luaronok irirao.

²⁰Inyasunio ngiboro daang aluaronok, sodi tonomia akim ibore nicha idongi.

²¹“Yob, tachamunos tokona ka Akuj, kisila ka ngesi, sodi kitopia ngesi iyong.

²²Tachamu ngakitatamet nakitatami ngesi iyong. Kirichak ngakiro keng alotau kon.

²³Ee, ejoikina iyong ibonguni nia Akuj Anaationon itiditeuna[20] sodi totubo naaronok daang na esubio anawi kon.

²⁴Tachaka egolit kon. Ani egolit kon loajokon noi, tachakak lotau a angolol anakoonon.

²⁵Kitiliwo Akuj Naationon egolit kon. Kimiek ngesi toliwor anikon akwangat naajokon,

²⁶sodi kigienokinor iyong Akuj Naationon ngirwa daang tokienyia iyong nia Akuj kon.

²⁷Ani ilipi iyong, iikini ngesi ngakiro kon, kitemok iyong ngakikongiet nakolong ikongi iyong.

²⁸Ejoker ibore daang ni isubi iyong, tacha akicha alorot kon.

²⁹Etiyauni Akuj lu inisasi nakaneni eyuuni lu itiditeuna.

³⁰Eyuuni ngesi lu nyesechito. Kiyuunio iyong erai kisub naajokak.”