Read turkana Yob 24 Bible Online

Yob 24 - turkana bible

Yob 24

¹Nyo peetiakunea Akuj Naationon akolongit a eriras? Nyo peetiakunea akolongit na esubere na eriyan kotere ngikasubak etich keng.

²Elemanarete ngitunga ngamoru na idodiunito ekukuor tanyaareta ngalup kech. Ekokoyete kesi ngamesekin, tomekis losipaan kech.

³Edemanarete kesi ngikokiok ngisikiria kech, sodi kiratakis emong a apuserut tanang etachi amicha keng.

⁴Ijukanarete kesi ngikebootok alorot, sodi tamataros ngikebootok toduka.

⁵Kanguna, esakete ngikebootok akimuj, loger a ngisikiria a moding. Emam nabo wache eanyuneta kesi akimuj a ngide kech.

⁶Elemete kesi ngamanat a ngitunga aluche, ka agerun ngamusabib alomusabib a ngitunga aluaronok.

⁷Eperete kesi kiiya kiwala emam ibore imukokinosi. Emam ibore iratakineta kesi akatorot.

⁸Etepi kesi akiru alomoru, tatapanakinos kesi natabab esakete akimech.

⁹Eyakasi lu ekoporete ngide lukokiok alosikin kata itiokech kitiliwosi ngikedalak kech. Ani ngide a ngikebootok, kiratakis tanang etachio amicha.

¹⁰Ilato ngide ngulu emuner emam ngiworui. Elemete kesi ngakanoi taarite akoro.

¹¹Echuunete kesi akimiet alokito, tochuut emuna alomusabib, ani kesi ngikulepek, enyamit akure.

¹²Ekunuasi lu etoakete alore. Ani lu ewanan noi ebalasi, ‘Toyuunae kare,’ nakaneni nyemisit Akuj akilipit kech.

¹³“Eyakasi ngitunga lu engerito akicha. Nyeyenete kesi ngirotin a akicha, kori nyiwapito ngirotin keng.

¹⁴Enyouni ekaaran na eribokinea topudo taar ngikebootok, toloma akoko nakwaare.

¹⁵Idaruni ekaloman akwap kikaikaak. Tama, ‘Emam itwaan kaanyungari ayong.’ Sodi kimuk ereet keng.

¹⁶Ebwangete ngikokolak ngakais nakwaare, ani naparan, toduka anakicha. Nyediposi kesi ka akicha.

¹⁷Ekerito kesi akicha naparan, tarai nyekerito aribu.” Tolim Sopar[21] tama,

¹⁸“Abe ibalasi esi, ‘Eleleari akaale kesi atipei. Ilamit Akuj na erai akech. Nyeringa ngesi eloseene anamanat a ngimusabib keng.

¹⁹Eger lo itokeiareta nikariran ka akamu eloch, ikokini aliel itongopiari ekasechan neni.

²⁰Nyeringa tani itiokeng itamunit ngesi tokona. Enyamete ngesi ngikuru tobosia loger a ekitoe alo eukoro.’

²¹Esubakinosi nguna kainyo aboliar ngesi ngapuseru, nabo nyisieno ngesi ngaberu nakolup.

²²Inyasuni Akuj lukajwok a ngikilinga keng. Ani enyouni Akuj, etoani itwaan niaronon.

²³Imiekini Akuj luaronok ibooyete akaalimon, nakaneni eriparit elote kech.

²⁴Isikokin itwaan niaronon wadiochichi ani eringa tooniyo loger a edoan, kori loger a akou a emwae etuborio.

²⁵Eyei itwaan epegi ebala nyikote nguna neni a? Eyei itwaan elimuni atamar alioko ngakiro kang a?”