Read turkana Yob 26 Bible Online

Yob 26 - turkana bible

Yob 26

¹Sodi tatachak Yob Bilidad tama,

²“Wae, abe kingarak iyong ayong dir, ayong lo arai itwaan nipalag! Iyuu iyong akan na elilimiyorit!

³Kisuruori iyong ayong a eger aloajokon, kitaanyu ayong dang ekabangabangat aosou kon!

⁴Esibit iyong ngae epupokini ngakiro kon daang? Ngae abala iyong kiruor loger logo?” Tatachu Bilidad[22] tama,

⁵“Emaranikinete ngikasiak anakipi alokwap ngalup.

⁶Engaara ni eyakasi ngikatoak ani a Akuj. Emam ibore erapit neni anakonyen keng.

⁷Apetakini kolong Akuj adis kidiama sodi kiwaak akwap natorite pas.

⁸Akuj ngesi ilelebi ngakipi lodowon, kiratak ngidowon lukirionok nyeepakas na inueta ngakipi.

⁹Erapi ngesi elap, topetak edou kidiama keng.

¹⁰Etiakuni ngesi ni iteete ngakonyen alokidiama anam toliwor ngesi etiakit akicha ka aribu.

¹¹Ani ikilakini ngesi ngapirio na itoweito adis, erikirikokinete kesi tamaranikis ebulit.

¹²Ngikilinga keng kolong edwangete anam.[23] Kotere aosou keng, taram ngesi etiengit lobe Raab.[24]

¹³Akienget kolong keng elotari adis. Akan keng ngesi echumi etiengit[25] lo a anam.

¹⁴Nakaneni eraakasi nguna ekwaas a ationis keng. Eraakasi nguna akingaingaa bon kiira ngoni. Ngae epedori akiyen eger lo epoloo Akuj dir?”