Read turkana Yob 27 Bible Online

Yob 27 - turkana bible

Yob 27

¹Tatachu Yob tama,

²“Ekong jik tani Akuj Naationon na erai Akuj na eyari. Akuj na ewounit asubea ayong na eriyan, ketiliwo ngesi ayong lo anyunyura.

³Ani eringa ayong eanga, toringa etau a Akuj eyei nikang,

⁴nyelimuni akituk kang ngakiro naaronok, kori nyelimuni angajep kang alioko.

⁵Nyapedori ayong alimun atamar iruorosi esi na iteni. Arubakini ayong eruoro atamar nyasechit, tanang akolongit na atoanea.

⁶“Aneikin ayong ateneanut kang nyalakakini. Ayeni ayong alotau kang atamar nyasechit.

⁷“Daang lu ketepegete ayong ketijiete, ejoikinit irirao loger a ngitunga aluaronok alu nyeteniyete.

⁸Eyei ibore igieno itwaan ni nyenupit Akuj na engerio Akuj ngesi a? Ee, nyoni igienokin ngesi na engedea Akuj etau keng?

⁹Ekoe, epupokini Akuj akigoro keng na eanyunea ngichan a?

¹⁰Epedori ngesi alakar ani a Akuj Anaationon a? Eliwor ngesi enyarit Akuj jiik a?

¹¹“Kimiek ketatam eger lo epoloo apolou a Akuj, ka akisisakin ngakiro na ereat Akuj Naationon.

¹²Kingolikisi a, iteni dir ingolikis tani esi ngikulepek. Nyo tokona iruorotor esi abangaanut?”

¹³[26]Eger logo ngesi iriraa Akuj Naationon ngitunga luaronok ichiekiarito luche.

¹⁴Epedorete kesi aanyun ngide lusapa lukaalak, nakaneni irikari akwara daang. Ekadit ngide kech akimuj jiik.

¹⁵Ani ngulu epuunosi, eari edeke. Nyigorosi tani ngaberu kech tosutonokis kotere akitu kech.

¹⁶Epedorete luaronok akiting ngaropiyae nakaalak na emam kona imarunio, kori totinga ngiworui lukaalak noi.

¹⁷Tani ikoni neni, itwaan niajokon enapi ngiworui ngulu. Ani ngaropiyae keng, lu nyesechito kesi ekoranakinosi.

¹⁸Akai na eduki itwaan niaronon, ikoni akai a asimokok,[27] kori ikoni epem lo iteere ngikieny alomana.

¹⁹Aperiet na esal, eperi ngesi erai ekabaran, ani ekienyuni, erukauni ebari keng kengopia.

²⁰Iteriangakini ebuloi ngesi loger a akaale, ekutari ekuwam ngesi nialonan nakwaare.

²¹Ekutari ngesi ekuwam lo alo kide anawi keng.

²²Ekutari ngesi ekuwam ngolo niaronon. Esaki ngesi amatar nakaneni nyepedori.

²³Eruonokini ekuwam ngesi ekeri, kitubul ngesi a nginyas aluationok.