Read turkana Yob 28 Bible Online

Yob 28 - turkana bible

Yob 28

¹“Eyei dir ni ebokere akwangat ka ni itosegere egolit.

²Ebokunete ngitunga asuat nakirion analup, ka akitekeiar ngasua nanyangayek anamoru.

³Eripete ngitunga tooma nikirion chuch. Esakete kwap noi ngalup, sodi tobokut ngamoru anikirion chuch.

⁴Nikalonan noi ani elomito ngitunga, kori ani itoreenete ngitunga, ngesi ebokete ngitunga. Esubete kesi etich anikasilon kaina, ipunasi anaunoi alotooma ngapanya.

⁵Eanyuununio akimuj analup. Nakaneni ani tooma ngalup napei nguna, Ibelukwaanario ibore daang kipudae.

⁶Eyakasi ngikabel lupusiek-arengak namoru, ani apua a ngamoru kanguna, eyei egolit.

⁷Emam egole eanyungari ngirotin lu elosere akibok ngamoru. Emam atarukot eporeene alokidiama ngirotin ngulu.

⁸Emam engatuny kori etiengit edio lokaadengan, lo itoreene lorotin lukasilok ngulu.

⁹“Ebokete ngitunga ngulu ngatabab nakaagongok noi. Ebokarete kesi ngakejen a ngimoru.

¹⁰Ani epedonokinete kesi ngiporotoi natabab, taanyut ngamoru nakaalak a ngaropiyae.

¹¹Ebokete kesi ni isiakineta ngangololin,[28] kisileereut ibore ni erapap.

¹²“Nakaneni nyaai ni eanyunere aosou? Nyaai ni kitatamar ngoni achwaanu?

¹³Emam itwaan eyeni ni ebunitor aosou, emam alotunga.

¹⁴Ebala nituluk a nganamea, ‘Emam anikang.’ Ebalasi ngitoroi, ‘Emam aosou anikosi.’

¹⁵Nyegielun a akwangat kori a egolit.

¹⁶Nyeriyanete ngesi ka egolit loajokon noi, kori ka asir a ngamoru.

¹⁷Ejok noi akidwang egolit, idwangit igulu a egolit kori agilas naajokon.

¹⁸Ejok aosou noi akidwang ekame, kori amoru nakamilimilan kori amoru naarengan puu.

¹⁹Amoru na enyaritae topas naajokon noi ka egolit loasegan noi, nyikwaanikinosi ka ajokis a aosou.

²⁰“Nyaai tokona ni isiakinitor aosou? Nyaai ni kitatamar ngoni achwaanu?

²¹Emam ngiborei lu eyarete lu eanyungarete aosou. Nyeanyungari tani ikeny ni eporit.

²²Tani akitu ka nginyas ebalasi eum pas kiira.

²³“Akuj bon ngesi eyeni erot. Ngesi eyeni ni eanyunere aosou.

²⁴Kainyo itee ngesi esal a akwap, itee ngesi ibore daang alokwap adis.

²⁵Nakolong ainakinea Akuj ekuwam apolou, sodi kigerok etiae a anam,

²⁶nakolong atiakunea Akuj ngirwa lu eramea akiru, ka erot lo iwapit agiro,

²⁷neni kolong engolikinea ngesi aosou toyen ajokis keng. Tacham ngesi atamar ejok aosou.

²⁸ “Abu Akuj tolimok ngitunga tama, ‘Akiker Ekapolon ngesi erai aosou. Achwaanu ngesi akinger naaronok.’ ”