Read turkana Yob 29 Bible Online

Yob 29 - turkana bible

Yob 29

¹Kiruorik Yob nabo tama,

²“Arai bo kikokini eboyor kang eger lokolong a ekingaren dang! Eger lokolong keyokiyo Akuj!

³Kirukit ayong ka Akuj jiik ngirwa ngulu. Kimau akicha keng alosi ayong anaribu.

⁴Ngirwa ngulu lukolong asorokonea ayong, kiyokiye Akuj awi kang.

⁵Kirukit ayong ka Akuj Naationon ngirwa ngulu, keriamito ayong ngide kang daang.

⁶Alepununio ngakile nakaalak anaatuk kang ka ngaanei. Alele akimiet alokito alu arupunito anatabab.

⁷Arai na iriamiriameta ngikasukou a ere, atolot ayong lokiriam ngolo,

⁸tachadaros ngisorok towaa alokwaas napei kengolikineta ayong. Ani ngikasukou tonyout towaa idodiunito arimatoi anikang.

⁹Nakengolikineta ngikapolok ayong, kililinga, tojongoto akiruoro.

¹⁰Tani ngitunga lu eyenikinitae lokojokon, kililinga chek.

¹¹“Itwaan daang ni kaanyungari ayong, kori ni eirari ngakiro kang, abu kian ngakiro naajokak kotere na asubi ayong.

¹²Nakegoronokinioto ngikebootok, engarak. Ani ngikokiok lu echanasi, engarak.

¹³Ngitunga lu echanasi lokojokon, kepuruut ayong. Engarak ayong ngapuseru, talakarotor.

¹⁴Abutokina ayong ngakiro na eteniyete loger a eworu. Atanap ngakiro na eriyan loger a apukot.

¹⁵Ayong arai ngakonyen alumuduk, atarai ngakejen alu engwalito.

¹⁶Alokebootok, ekoni ayong apakech. Ani alochan, ebaka ka ngitunga a akwap anache.

¹⁷Enyasuni ayong agogongu a ngitunga alukamoitanak, sodi atoyuu ngitunga lu aremokino kesi.

¹⁸Etamit ayong jiik atamar ebooyi nikooyen, atotoan alakara anawi kang.

¹⁹Ekoni ayong ekitoe lo eyakasi ngaten na ngalup nakipi jiik, nabo kitapapalito ngakop ngaten keng na alokidiama jiik.

²⁰Kepuruunit ayong itwaan daang jiik, emam akolongit adaunotor ngikilinga kang.

²¹“Arai na alimunio ayong akiroit, kililinga ngitunga, topupokis lokojokon ngakiro na alimuni ayong.

²²Ani keruorik ayong kerumor, amam ngakiro ngache eatanakinete kesi. Tolomasi ngakiro kang naki kech, loger lo elometa ngakipi a akiru nalup.

²³Keitanito kesi ayong jiik loger lo iitanitotor atepun a akiru.

²⁴Amaisanakini ayong kesi na esiliyoreta. Kitalaka kesi amaisan kang.

²⁵Atotiakuunu ayong ngakiro na esubete kesi. Atorik ayong kesi loger lo erikio ekapolon ngasigerea keng, esiengu kesi na ajamakinotor.”