Read turkana Yob 30 Bible Online

Yob 30 - turkana bible

Yob 30

¹Nakaneni kakianatar tokona ayong ngitunga lu esorokoka akidwang ayong. Araakasi kolong taapakech lupasiyek, lu peadikino ayong tani emiekini kiratakis ka ngingokwo kang ngaanei.

²Araakasi kesi atukuoru a ngitunga alu alilimiyorito, alu apalag noi, amam etich kang adikino esubakinete.

³Eboosit kesi noi tanyamite akoro arai anyakayete ngigilae lukoonok nakwaare alomoding ani esil.

⁴Aditunete kesi ngikito lu eyakasi nariet tanyama, tanyama tani ngaten nakapenak[29] a ngisanyana.

⁵Tachalakis ngitunga daang kitwarakis kesi, tosub ngikokolak irisito echalatar.

⁶Ebooyete kesi anaburiburio, anaduon ana abokitae lokwaasea a akope.

⁷Toruoto kesi alomoding loger a ngitieng, tochunakinos nachara.

⁸Atukuoru a ngitunga alupasiyek alukabangaanak kangulu, apon kitwarakinae anakwap.

⁹Aliwor tokona ayong kaitanakinio ngieosio. Aliwor kakianatar kesi.

¹⁰Akadakinit ayong kesi, achadarosi kesi anikang. Nyeriakasi kesi akimoakin ayong napei kengolikineta.

¹¹Ani kona ketapalagagea Akuj ayong ketililimiyo, kanyoikis kesi ayong kanyunyurikinosi.

¹²Enyouni atukuoru ngina aloteten kang, kerita ayong erukokin. Kesiwapakis kesi ayong ngirotin lua nginyas.

¹³Etongopiasi kesi erot kang daang lo asiiwakinea ayong, esakete amunyar ayong. Nakaneni emam itwaan iratakini[30] kesi.

¹⁴Ijukunosi kesi kitorut lopukei anawasea kang, pot katotikokinosi.

¹⁵Kabulit ayong noi. Angopia arimatoi kang loger a ekuwam. Angopia ajako kang loger a edou.

¹⁶Edikino tokona ayong atoani. Katinga ayong ngichan lokojokon ngirwa lugu.

¹⁷Kariebete ayong ngakoyo kang daang nakwaare. Nyetubo apipilu nakadupakin ayong.

¹⁸Karuakin Akuj ayong eworu, sodi tomojirikin ngiworui kang tomodokoikin.

¹⁹Kachakakini ngesi ayong lochoto. Ekok ayong apua ka ekuron.

²⁰Kekaloikini ayong iyong Akuj, nakaneni nyitachi iyong ngakiro kang. Ani elipi ayong, nyikimisit iyong ayong.

²¹Kiremokin iyong ayong. Kiboliar iyong ayong a agogongu kon kadaang.

²²Imiekini iyong ekuwam katokuta ayong. Kileleenori iyong ayong alokuwam aloationon.

²³Ayeni ayong atamar kiyaarit iyong ayong nakitu kang, akitu na idarit itwaan daang.

²⁴Nyo itijio iyong itwaan ni adaun? Itwaan ni emam ibore epedori asubakin, mati akilipa atamar kingarakinae.

²⁵Ikwa kolong pekegoro ayong ka ngitunga lu aanyunito ngichan a? Ikwa pekesienito ayong ngikebootok a?

²⁶Ani na asakitor ayong naajokak, pot naaronok. Ani na edaritor akicha, bu aribu.

²⁷Ketubur ayong akichana ka apipilu. Akolongit daang ayei ayong lochan.

²⁸Erioner akwaan kang chuch, nakaneni meere kotere nikanomitor akolong. Anyouni ayong atowo alongaren ngitunga atolim atamar kingarakinae.

²⁹Aliwor ekolowo lokaatokang. Aliwor ayong erukitos a ekalees.

³⁰Elocho amuny kang erioner ka abolochuun, edeakasi ngakoyo kang kariebete.

³¹Aliwor agita kang na alakara aka akigoro. Ani ebune kang lo a alakara aliwor aka ngitunga alu igorosi.