Read turkana Yob 31 Bible Online

Yob 31 - turkana bible

Yob 31

¹“Ekong ayong atamar nyengolikini apese keterekuya.

²Nyo kitaanyuni ngoni Akuj Naationon? Etacheene ngesi na esakete ngitunga a inyo?

³Eyaununi ngesi ngichan ka nginyas lotunga lu esubete naaronok.

⁴Eyeni Akuj ibore daang ni asubi ayong. Itee ngakikalamikinet kang daang.

⁵“Ekongi ayong atamar nyesuba ayong naaronok kori nyesaka akingalare ngitunga luche.

⁶Kimiek Akuj ketem ayong anakitemiet ana eteniyete, sodi kingolik atamar nyasechit ayong.

⁷Ani kenacharit ayong alorot, kori atacham naaronok keriarete, ani kinyasunit akisech ngakan kang,

⁸kimiekisi ngalemet kang kinyasunae, kori kimiekisi ngitunga luche tanyama akimuj na etae ayong.

⁹“Ani kaminarit ayong aberu a itwaan aniche, sodi atoduk ayong edaru anikalapatan akai keng,

¹⁰kimiekisi aberu ngina kipoonok ekile eche.

¹¹Ejoikinit eriras a ngakiro anaaronok ana ikote nguna erai akitu.

¹²Kainyo kikok akitu akim na inyasuni ka akirirare ibore daang ni atingit ayong.

¹³“Arai na ketongolopea ayong epei a ngikasubak etich kang, atopupok ayong ngakiro keng atosubea na eriyan.

¹⁴Arai nyeekok ayong neni, kekok ayong aweikini Akuj ai? Kerai ngakiro anu alimuni ayong nakeriraa Akuj?

¹⁵Akuj nakasubuni ayong ngesi asubuni ngikasubak etich kang dang.

¹⁶“Nyewouna ayong akingarakin lukebootok. Kori nyejamuara ayong ngapuseru.

¹⁷Emam akolongit emujea ayong emik ngikokiok akimuj.

¹⁸Ekok ayong apakech alukokiok, atorik napei alokiditeu kech.

¹⁹Na engolikinea itwaan ni ichana, ni erai ekebootonit ni emam kona egieli ngiworui,

²⁰abu ainak eworu lo edonyunitoe anajul a ngamesekin kang. Sodi kepuruu ngesi ayong a etau keng kadaang.

²¹“Ani kengalat ayong ngikokiok ayeni atamar kaikinio anitubet ngakiro,

²²kimiekisi ngakan kang tobilas napei alosegeta, torutunos.

²³Nyapedori ayong akisub ngakiro na ikote nguna, kainyo akerit ayong eriras a Akuj.

²⁴Nyigienokino ayong nakanuan ebari

²⁵kori nyinisakina ayong kotere ebari kang.

²⁶Nyilipa ayong akolong nakanuan tani kekwaikwai, kori nyilipa elap tani kibus noi.

²⁷Aringa ngiboro ngulu nyibatara ayong kori nyenuakina ayong akan kang ani arimar ngiboro ngulu.

²⁸Ejoikinit eriras a akisech ana ikoni ngina erai akitu, kainyo engalat ayong Akuj na eyei kidiama.

²⁹“Emam akolongit alakaror ayong na eanyunea emoit kang ngakiro naaronok.

³⁰Nyechamuna ayong akituk kang esechi, atanyarak emoit kang akitu.

³¹Eyenete ngikasubak etich kang daang atamar epeyoununi ayong ngitunga lugelayek.

³²Anyaraununi ayong ngikalotok nawi kang, nyemianakini eperete lorotin.

³³“Esakete ngitunga luche akidaa ngasechesea kech, nakaneni nyidaa ayong nakang.

³⁴Nyekera ayong ngakiro na elimunete ngitunga. Nyililinga ayong kori nyegolokino kai ani akeritor ngimeny kech.

³⁵“Arai bo toyei ni iirari na alimuni dang! Ekongi ayong atamar iteni ngakiro kang daang. Kimiekisi Akuj Naationon tatachu ngakiro kang. Arai kolong kigiretei ngakiro nakerirator ayong emoit kang engolik ayong,

³⁶kanap ayong aloseget kang ewogar, ka akinap anakou kang loger a ekiraun.

³⁷Kalimok ayong Akuj ibore daang ni asubit, sodi kekileenik alongaren keng.

³⁸“Ani kakokoit ayong ngalup na etae sodi atodema ngikulepek,

³⁹ani kanyamit ayong akimuj na arupuni kaneni emiek ngiketak emunyari akoro,

⁴⁰kimiekisi edoan ka ngiikwa toruput kaneni, meere ngakanoi ka erau.” Adaunosi ngakiro a Yob.