Read turkana Yob 32 Bible Online

Yob 32 - turkana bible

Yob 32

¹Ani kona awounea Yob ebala atenoono, apot ngikiliok luuni tokuruwo kona etachete ngakiro keng.

²Nakaneni abu itwaan ni anyaritae Eliu ni awei kaneni tongo, kainyo abala Yob atenoono ngesi akidwang atamar Akuj etenoono. (Arai Eliu lokookeng a Barakel, alesit a Bus, tarai eka emachar a Ram.)

³Angoikinit ngesi talopaekeng a Yob luuni, kainyo angopikinit kesi kona etachete ngakiro a Yob, tarai abalasi Yob esechit.

⁴Kona araakar Eliu adit anikech, edarit ngesi ngikasukou daang torumosi mono ekiruor.

⁵Ani ingolikini ngesi atamar akuruwo ngikiliok luuni ngulu atachun ngakiro a Yob, abu tongo.

⁶Abu Eliu kiruorik tama, “Asorokona ayong, imojongito esi. Kotere ngakiro nguna, akerit ayong alimokin esi ngakiro na etamit.

⁷Alimuni ayong atama, ‘Kimiekisi ngimojong kiruorikis, kimiekisi ngikasukou tolimut aosou kech.’

⁸Nakaneni etau lo eyei tooma lotunga lo a akienget a Akuj Naationon ngesi einakini kesi aosou.

⁹Meere amojongu itoosuni ngitunga, kori ngesi iteyeni kesi ibore ni iyookino.

¹⁰Tokona bocha abala ayong, ‘Topupokisi ngakiro kang. Kimiekisi katolimok esi ngakiro na etamit ayong.’

¹¹Arubakinit ayong apupokinit na iruorotor esi. Atopupok ayong ekiruor kus lo a aosou, na ingicheta esi na ilimunete.

¹²Atopupok ayong ngakiro kus lokojokon noi, nakaneni emam akiroit nateno na eira ayong. Kikuruwo esi daang akitopeg ngakiro na alimu Yob.

¹³Ikokinete esi itamarete ianyut aosou ai? Akuj etachi ngakiro a Yob, kainyo kikuruwosi esi.

¹⁴Esi kisuruori Yob, meere ayong. Nakaneni pekatachunit ayong ngakiro keng loger lo itachuneta esi.

¹⁵Yob, akuruwosi lugu ngakiro, emam nakitachakinete iyong.

¹⁶Tokona, arubakini ayong edarit na ililingeta kesi chek a? Ewaasi kesi kaneni emam akiroit ache elimunete.

¹⁷Atachuni tokona ayong dang, katolimok iyong na etamit ayong.

¹⁸Emam ayong kona eratakini ngakiro. Nyeringa edari akiruorikin.

¹⁹Ani pekachamakin eruorikini, abwanga loger a etuo alo ileleba emuna lokitetet.

²⁰Emam ayong kona anaikini. Kimiekinae eruorik.

²¹Emam ewae ebakea ayong alokiruor kalo. Emam itwaan esoswae ayong,

²²kainyo nyayeni ayong akisosware. Kainyo kaari ayong Akuj atipei kotere ngakiro nguna.”