Read turkana Yob 34 Bible Online

Yob 34 - turkana bible

Yob 34

¹Torubak Eliu iruoro ebala,

²“Esi ngikoosok, topupokisi ngakiro kang. Todetasi ngaki kus esi lu ichwaaka.

³ Eroanari akit ngakiro loger lo iirea angajep akimuj.

⁴Atoseutu na eriyan. Ee, atoseutu aniyok akiroit na ejok.

⁵Ebala Yob, ‘Nyasechit ayong, nakaneni awou Akuj akidodikin na eriyan.

⁶Tani kateneana ayong, itamitae atamar aliokono. Awou ajeme kang angalekin, tarai nyasechit ayong.’

⁷“Eyei itwaan ni ianyu iyong nakanuan ni ikoni Yob a? Nyidodiuni ngesi arimatoi ani a Akuj jik.

⁸Emina ngesi arukit ka ngitunga luaronok, kilato ka ngikasechak.

⁹Abe ebala ngesi nyejok itwaan ichana esaki akiwap ngakiro na esakit Akuj.

¹⁰“Topupokisi ngakiro kang, esi ngitunga lu ichwaaka! Epedori Akuj Naationon akisub ngakiro na ichwangakina a?

¹¹ Einanakini ngesi ngitunga ebachit kotere na esubete kesi ka asubea kesi na ejoikinit esubere.

¹²Nyesubeene Akuj Naationon akisech. Nyepedori ngesi asubea itwaan na nyeriyan.

¹³Ngae kolong ainakini Akuj apolou? Ngae kolong ainakini Akuj apolou na epolokinio akwap?

¹⁴Arai tobuari Akuj akienget,

¹⁵ketoana itwaan ni tokona eyari daang, tobongo itwaan napua.

¹⁶“Topupok tokona ngakiro kang kios iyong.

¹⁷Irirae iyong Akuj na etenoono a? Esibit iyong eremokino ngesi ngakiro na eriyan a?

¹⁸Irirae Akuj ngikapolok ka ngikarikok ani eraakatar kesi ngitunga lupasiyek toroko.

¹⁹Nyibakit ngesi alowae a ngikapolok kori nyemisit ngakiro a ngikabarak noi akidwang na ngikebootok. Kainyo ngesi kolong asubi kesi daang.

²⁰Epedorete ngitunga atoakere atipei nakwaare. Itamaranikini Akuj ngitunga tadaunos. Eari ngesi lukajwok emam itwaan aram.

²¹“Iseme ngesi elote a ngitunga. Daang na esubete kesi, itee ngesi.

²²Emam aribu na irioner chuch noi kidaa ekasechan ani a Akuj.

²³Emam ngirwa[31] eseunit Akuj atamar tolooso ngitunga ngaren keng kirirae

²⁴Elemanari Akuj ngikarikok nyeripa ngakiro kech, kilunyok luche nados kech.

²⁵Ikwaanakini neni ani eyenea na esubete kesi. Engichi ngesi kesi kirie nakwaare.

²⁶Irirae ngesi ngikasechak kitee ngoni,

²⁷kainyo apalikis kesi akiwapit ngesi, emenyasi ngitalio keng daang.

²⁸Esikalounete kesi ngikebootok kikaloikis Akuj, kiira ngesi akigoro kech.

²⁹“Arai totiaku Akuj atamar nyasubakini ibore tani ipei, kemam itwaan elimuni atamar erono Akuj. Arai kidaa ngesi ereet keng, kemam ikengarakinan ngitunga.

³⁰Kemam ibore esubakinete ngibukui kiratakineta ngikechekiarak lu nyenupito Akuj nyeepolokis kesi.

³¹“Yob, ilimok iyong Akuj ngasechesea kon a? Sodi kichikak ngesi atamar nyisechi nabo a?

³²Ilip mono iyong Akuj atamar kidodik ngasechesea kon a? Ichamu iyong atamar ipalikini akisub naaronok a?

³³Ani kona itopegea iyong ngakiro na esubi Akuj, ikwa esibit iyong esubakini ngesi ngakiro na isakit iyong a? Iyong ejoikinit itiakuni ngakiro, meere ayong. Tolimokinae tokona sua ngakiro na itamit iyong.

³⁴“Itwaan nikooson daang ka ni echwaana ni eirari ngakiro kang, etamari

³⁵iruoro Yob napenyeyeni nabo ngapasiyek ngakiro keng.

³⁶Tochiwasi ngakiro daang na iruoro Yob. Ingolikinete esi atamar iruoro ngesi loger a itwaan aniaronon.

³⁷Iatanakini ngesi akinger ngakiro nasechesea keng. Ekianar ngesi Akuj alongaren yok kadaang.”