Read turkana Yob 35 Bible Online

Yob 35 - turkana bible

Yob 35

¹Torubak Eliu iruoro ebala,

²“Nyitemokino iyong Yob iruoro ibala, ‘Nyasechit ayong alongaren Akuj,’

³kori akingit Akuj tama ‘Nyo kon akisech kang? Nyoni aanyu ayong ani nyesecha?’

⁴Atachuni ayong ngakiro kon ka na ngipaalon kon aapei.

⁵“Kingolik chene adis! Taanyunga eger lo eyakatar ngidowon kidiama noi!

⁶Ani kisech iyong, nyewani akisech kon Akuj. Ani kisub iyong ngasechesea nakaalak, esibit iyong eyei erot lo iwanitor iyong Akuj a?

⁷Ikwa ingarakinit iyong Akuj ani iraakar lo itenoono a? Emam ibore esaki Akuj anikon.

⁸ Itwaan niche ewanan kotere ngasechesea kon. Ani naajokak na isubi iyong, ingarakinito itwaan ngini.

⁹“Epodokinete ngitunga na ichiekiarere. Ikalounete kesi esakete kitoyuun.

¹⁰Nakaneni nyerearosi kesi nia Akuj ana erai Akasubunan kech, ana ingarakini kesi na eanyuneta ngichan luationok.

¹¹Nyerearosi kesi nia Akuj ana kitoosuni ngoni, atoosokioto noi akidwang etiengit kori ikeny.

¹²Igorosi kesi esakete akingarakino, nakaneni nyetachi Akuj ngakiro kech. Kainyo inisasi kesi eroko.

¹³Ngapasiyek ngakiro na igorotor kesi. Nyitee Akuj Naationon kesi kori nyepupi ngakiro kech.

¹⁴“Yob, abe ibala iyong nyitee Akuj a? Kidarou. Eyakasi ngakiro kon ngaren keng.

¹⁵Itamit iyong atamar nyirirae Akuj, kori be nyekachit akisech.

¹⁶Eka pas eger lo irubakinitor iyong akiruoro. Etakani dir atamar nyiyeni iyong ngakiro na iruoro.”