Read turkana Yob 36 Bible Online

Yob 36 - turkana bible

Yob 36

¹Torubak Eliu iruoro ebala,

²“Tanaik ngakiro kang wadio kedodik. Eyakasi ngakiro a Akuj na asaki ayong alimokin iyong.

³Elal aosou kang, kotere aosou ngina, apedori ayong akidodiun atamar etenoono Akuj na erai Akasubunan kang.

⁴Emam ngakiro kang na eraakasi alioko. Erai itwaan ni itee iyong en nikooson dir.

⁵“Erai Akuj nakaagongon noi, emam ni imenyarit. Eyeni ngesi ibore daang.

⁶Nyimianakini ngesi ngikasechak eyarete. Nakaneni esubanakinea lu eboliare na iyookino.

⁷Nyingoliari ngesi wache ani eyakasi lu etenooko. Echamuni ngesi kesi epolokinete loger a ngikapolok taanyut arimatoi nakajik.

⁸Nakaneni ani keen ngitunga a ngiriko, ichanasi kesi kotere na esubete.

⁹Idodikinit Akuj kesi ngasechesea kech ka ekinis kech. Idodikinit atamar eraakasi kesi lu inisaka.

¹⁰Engaari ngesi ngaki kech topupokis. Todungok kesi atamar toisikis naaronok.

¹¹Ani kiwapa kesi ngakiro a Akuj tosuba etich keng ibooyete kesi niajokon ngirwa daang. Kibooyoto akaalimon jiik.

¹²Nakaneni ani pekiwapa kesi, eario, totoaka kotere abangaanut kech.

¹³“Engoito lu nyekerito Akuj jiik. Ani tani na iriraare, nyikalounete esakete atamar kingarakin.

¹⁴Etoakete kesi eringa esorokoka, tadakakin eboyor kech lomalaanu.

¹⁵Itatami Akuj ngitunga kotere ariaba nabo ngichan engaanarea ngaki kech.

¹⁶Kipuduni iyong Akuj alochan, kiwaak ni emam naaronok. Toritakinae akimuj lomeesa kon.

¹⁷“Nakaneni kirirao tokona iyong dir loger a itwaan aniaronon. Kidolok tokona iyong eriras ka ngakiro na eriyan.

¹⁸Tochoikin wara anyunyura nyikingal iyong toliwor itwaan ni imenyena. Tochoikin nyikibata ebari.

¹⁹Emam ibore ianyuni iyong ani igoror isaki atamar kitoyuun. Nyikiyuunete iyong tani ngikilinga kon.

²⁰Nyiisak atamar bu akolongit na emunyarere ngitunga.

²¹Tochoite irear nakisech. Araakasi ngichan kon lu asakere iyong tobuchun anakisech.

²²Kitamu eger lo epoloo agogongu a Akuj. Epol ngesi noi akidwang ngiketatamak daang.

²³Emam itwaan elimokini Akuj ngakiro na echamit esubakini, kori atamar ichwangakinit ngesi.

²⁴“Ikuseeneo ngesi jiik kotere na esubi. Ejoikinit iyong dang ikusi ngesi.

²⁵Engolik itwaan daang na esubi Akuj. Itee itwaan nguna anialonan.

²⁶Emam itwaan eyeni apolou a Akuj kori emam itwaan imarunit ngikaru keng.

²⁷Akuj elemari ngakipi analup kiloch kitiliwo ngakipi a akiru.

²⁸Ngesi itarami akiru alodowon. Totep kotere ngitunga daang.

²⁹Ngae eyeni eger lo elooso ngidowon? Kori eger lo ebelakinea togirok kidiama, ni ibooyo Akuj?

³⁰Epetanari ngesi akimilea wadaang alokidiama. Nakaneni kidong nituluk ananam eribokinit.

³¹Ikoni ngesi irirae[32] ngitunga neni. Naanak akimuj nakaalan.

³²Irumuni ngesi akimilea a ngakan keng todungok atamar tobelak ni esaki ngesi.

³³Elimori agirokin atamar ebunit ekuwam. Toyena ngaatuk atamar ebunit ekuwam.”