Read turkana Yob 37 Bible Online

Yob 37 - turkana bible

Yob 37

¹Itamaranikini agiro etau kang kitodouunu anipalem eyei.

²Topupokisi agiro a etoil a Akuj ka agiro na epudunit anakituk keng.

³Epetakini ngesi akimilea kidiama, napei alowae a epei tanang loche.

⁴Ani ekisidi kiirarae erue a etoil keng erue loketimon a agiro, esaa ngolo daang kimileaununi akimilea.

⁵Egiro etoil a Akuj niationon. Esubi ngesi ngakiro nakatalarak nyikipedori ngoni akiyen.

⁶Kainyo elimokini ngesi eloch tama, ‘Min nakwap.’ Ani elimlim ka akiru tolimok ngesi tama, ‘Talalaar.’

⁷Itadauni ngesi ngitichisio a ngitunga. Kidodik kesi etich keng.

⁸Eloose ngitieng a moding toduka anaduon kech.

⁹Ekutuni ekuwam lo ipiri alokuju, ani akatorot nakaalimon noi tokut alokwap.

¹⁰Isipuki akienget a Akuj ngakipi, sodi toliworos ngakipi ngamoru.

¹¹Ilelebi ngesi ngakipi lodou lolangir. Epetarito ngidowon akimilea keng.

¹²Eger lo epolokinitor Akuj, irimito ngidowon jiik, kidiama akwap na ibooyoto ngitunga, loger lo edungunitor Akuj.

¹³Eyauni Akuj akiru tobukok nakwap. Eyauni ngesi akiru kirira ngitunga, kori kidodiunea atamar amina kesi.

¹⁴“Topupok mono iyong ngakiro nugu Yob. Kitama ngakiro nakatalarak esubi Akuj.

¹⁵Iyeni iyong dir eger lo edungunio Akuj ngakiro, sodi kisimileau akimilea anadis a?

¹⁶“Iyeni iyong eger lo eporitotor ngidowon alokidiama a? Erai etich ngolo lo kitalari a ekunonoonu a Akuj.

¹⁷Iriabakin iyong kotere ebuuse erai na ekutunea ekuwam lo ebunit alokuju nakwap.

¹⁸Ipedori iyong dir apetar adis loger a Akuj a? Ipedori iyong dir akitogogong loger a asuat anasek kitekearitae a?

¹⁹Akuj, kitatamae sua ngakiro nakilimuni. Echakina sua ngakies chek, emam ibore kilimuni.

²⁰Nyalimuni ayong atama asaki eruoro ka Akuj. Nyo nitibore edikino ayong etumunyaror ngesi en?

²¹“Emam tokona ngoni kona kikienyikini akicha na ebunit alokidiama. Ekwang akicha ngina kea. Nakaneni elota ekuwam kidiama aseger.

²²Etakani amilimilu a egolit alokwap. Ani akibuseanu a Akuj, kitubul ngoni noi.

²³Nyikipedori ngoni aapiyar diyete Akuj Naationon. Egogong ngesi noi nabo itiriyanit ngakiro. Etenoono ngesi noi nyichwangakini.

²⁴Ngakiro nguna kesi ekeritotor ngitunga ngesi. Imenyarit ngesi daang lu iwogasi ebalasi kiosok.”