Read turkana Yob 38 Bible Online

Yob 38 - turkana bible

Yob 38

¹Abu Ekapolon Akuj kisuruorik Yob alotooma ekuwam lo ipiripiri tama,

²“Ngae iyong itoniaritor aosou kang a ngakiro kon anapasiyek?

³Towo tokona lokile tatachu ngakiro nakengisi ayong iyong.

⁴Aliwae iyei iyong nakolong etowea ayong ngapirio a akwap? Tolimokinae kichwaana iyong.

⁵Ngae kolong egerokini alolom a akwap? Iyeni iyong a? Ngae kolong etenari auno na etemere?

⁶Nyo etingakinit ngapirio[33] na itoweito akwap? Ngae ewaakini amoru na alokwap ngateak

⁷akwaar na aeokinito ngikanyer lua ataparach aapei, talakaros ngiborei a adis daang kimaritetekis?

⁸Kori ngae kolong agolokini ngidorin a anam, nakolong abwangunotor ngakipi anakook a anam?

⁹Ayong kolong aburi anam a ngidowon sodi atarapak naribu.

¹⁰Ayong egerokini anam ekukuor, eratak a ngidorin alu agolitoe.

¹¹ Atolimok atama, ‘Ekukuor kon nege, tochoite ipori nege. Esalunete ngitoroi kon lukaruok kane.’

¹²Yob, napei kolong kidounere iyong, eyei akolongit idungunio iyong atamar kiwala?

¹³Eyei akolongit idungokinea iyong akiwalar bu, kitwarak ngitunga luaronok ani edukitotor a?

¹⁴Isileereuni akicha ngimoru ka ngadipoe loger a ngabilakinet a ngiworui. Kileereto loger a emachar alo igerokinitoe lochoto.

¹⁵Ekwang akwangis a apaaran kea kotere luaronok. Iratakini kesi nyeesuba naaronok.

¹⁶“Imin iyong dir ni eyakasi ngileleae a anam a? Kori ilot iyong nituluk noi ichiekit ngalup a?

¹⁷Eyei itwaan kidodik iyong ngidorin lu egolitere aribu nakirion chuch na eyakasi ngikatoak a?

¹⁸Esibit iyong etia apolou a akwap ai? Tatachakinae chene nguna daang kiyeni.

¹⁹“Iyeni iyong ni ebunitor akicha kori ni isiakinitor aribu a?

²⁰Ipedori iyong alimokin kesi atamar toloto tananga nibe ati, kori ipedori abuar ni aponeta?

²¹Ayeni ayong atamar ipedori iyong alimun kainyo imojongit iyong noi nabo iyei kolong ngirwa lu asubakinere akwap.

²²“Eyei akolongit ilosio iyong lokerui lu ewaakinit ayong eloch ka ngamoru a akiru a?

²³Ekacharit ayong kotere ngirwa lua ngichan, kotere ngirwa lua ngichan ka ejie.

²⁴Inang iyong dir ni ejipuunia akolong a? Kori ni ekutuunia ekuwam lo akide a?

²⁵“Ngae aboki eporoto a ngakipi a akiru? Ngae asubakini erot a agiro?

²⁶Ngae itetepi akiru nariet ni emam ngitunga elomito?

²⁷Ngae ebukokini ngakipi nakwap nakoonon deu kiturup nginyia?

²⁸Eyei akiru apakeng a? Kori ngae auri ngakop?

²⁹Nakook a ngae aponeta ngamoru a ngakipi? Ngae auri eloch,

³⁰ lo ilochi ngakipi toliworos ngamoru ka akisipuk ngakipi a anam?

³¹“Ipedori iyong ainikin ngakanyer wapei a? Kori ipedori iyong alachakin ngaenet na eenitere ngikanyer lu enyaritae ngikaremok?

³²Ipedori iyong akirik ngikanyer ngakamusio ka ngakiporosea daang a? Ipedori iyong akirik ekanyerit lo enyaritae etom loapolon ka ngide keng daang a?

³³Iyeni iyong ngitalio lu epolokinito adis a? Ipedori iyong akitiliwor ngitalio ngulu ngika akwap dang a?

³⁴“Ipedori iyong akiremar todungok ngidowon ngakiro sodi yauneta kesi akiru nikon a?

³⁵Ani kidungok iyong akimilea atamar kimileau, Epedori ngesi abunere nikon tama, ‘Ayong na?’

³⁶Ngae iwaakinit aosou lodowon? Kori ngae iwaakinit achwaanu loloch?

³⁷Ngae eos noi epedori akimarun ngidowon kori ngae epedori akirii kesi totepea akiru?

³⁸Akiru na isipuki apua toliwor ngakapongor.

³⁹“Isakanakini iyong ngingatunyo akimuj kech a? Itaneene iyong ngitak a ngingatunyo lu enyamit akoro

⁴⁰na edukitotor anaburiburio a? Kori na edukitotor anamon a?

⁴¹Ngae itani ngikuruka na ilatotor enyamit akoro kori nakegoronokinioto ayong ngitak kech esakete akimuj na enyamete.”