Read turkana Yob 39 Bible Online

Yob 39 - turkana bible

Yob 39

¹“Iyeni iyong ngirwa lu eurieta ngatirikiki a? Iseme iyong ngagetei euriyete a?

²Iyeni ngilapio lu irikanarete kesi ekapete a? Iyeni akolongit na eurieta kesi a?

³Iyeni akolongit na eurienikinotor kesi toureta ngitak a?

⁴Edakasi ngitak kech amoni sodi kingaarikis. Erotokinete kesi nyeebongut nabo.

⁵“Ngae alakakini ngisikiria lu alomoding eloose? Ngae alachakini kesi kimiek irimito akwap?

⁶Ainakini kolong ayong kesi ariet toliwor awi kech. Emiek kesi pena naroatin a amakat.

⁷Echadarosi kesi alochale a ngirerea. Emam itwaan eeni kesi kitusub etich.

⁸Ngimoru eraakasi achokor kech ni esaketa kesi ibore nialiban daang tadaka.

⁹“Epedori dir ekosowan akisub etich kon a? Epedori ngesi akiper nanok kon a?

¹⁰Ipedori iyong ainikin auno lokosowan kitaa amana kon kori kirii emeleku lochilet amana?

¹¹Ipedori iyong akigienokin ngesi ani eyakatar ngikilinga egogongio a? Tasak atamar kitosubak etich loationon a?

¹²Igieno iyong atamar kiinuni ekosowan ngalemet anawi a? Itamit iyong atamar echunakini ngalemet ani eramere a?

¹³“Iwakiwaki ekalees ngabeben ematara ipirakinit! Nakaneni emam ekalees eporori loger a pelekuto.

¹⁴Imiekini ekalees ngabeyei keng alokidiama ngalup sodi kisubus niamonan a ngalup.

¹⁵Ikwa nyeyeni ngesi atamar epedorio akichiak. Kori epedori etiengit akibwang.

¹⁶Eboliar ekalees ngitak keng kwa ibore esibit meere ngikeng. Nyemisit ngesi tani kinyasun etich keng.

¹⁷Ayong kolong etabangaani ngesi nyeetaanyu ngesi aosou.

¹⁸Ani iwakawakakini ngesi ngabeben esaki akipungar, ekianar ekalees angole ka ekamean angole.

¹⁹“Yob, iyong kolong itiliwori ngangolei na ngikilinga a? Iyong kolong iwaakini lomosiringan kech ngajul na emalimalete a?

²⁰Iyong kolong itoporoporoe kesi loger a ngimases a? Iyong itiliwori kesi itoemete ngitunga a akitusa kech a?

²¹Ichiekete kesi ngalup anadipo. Ematarosi kesi lojie a ngikilinga kech kadaang.

²²Ekianar angole ebuloi, emam ibore eemi. Etenikini ngesi tani ekileng, nyebongi.

²³Ngiboro lujiet lu etingito ngikameak ngangolei, igolagolasi kinwakunite akolong.

²⁴Ipungar angole toten ngaren engoit tamarani. Ani ekutakinio aburuch, nyeweyi ngesi.

²⁵Napei ekutakinere aburuch, itusakini ngesi. Inguunete ngesi ejie eringa elona. Kiira ngikarikok a ngasigerea edungunete ngakiro.

²⁶“Erai nikon itatamar egole akipor a? Ikwa iyong itopetanari ngesi ngabeben keng tokienyiasi kuju a?

²⁷Ikwa eporonori egole kotere ngakiro na idungunit iyong sodi todukok akai keng kidiama emoru a?

²⁸Edukeene egole akai keng kidiama ngatabab, kitiliwo ngaitae awas a akai keng.

²⁹Toliwor ngesi kaina ingolianari nikalonan ka nikaapean, esaki ibore ni eari tanyam.

³⁰ Echunakinosi ngigolei ni etoanikinit ibore, tamata ngitak kech ngaakot.”