Read turkana Yob 4 Bible Online

Yob 4 - turkana bible

Yob 4

¹Ani erumor tatachak Elipas lo abunit alo Teman Yob tama,

²“Yob, ingoi tokona iyong erai kesuruorik ayong iyong a? Nyapedori robo ayong achakin chek jiik.

³Itatam iyong ngitunga lukaalak, nabo itogogong ngakan napalag.

⁴Esichiat ngakiro kon itwaan ni adakara. Itogogong iyong ngakungin na itagatagasi.

⁵Erai tokona akolongit kon naga na ianyunea ngichan, nakaneni ibunyakin iyong. Napei tokona kitapeta iyong, kitobul.

⁶Meere ni ikeritor iyong Akuj ititinyio iyong a? Meere amamau kon akisech igieno iyong a?

⁷Kitama chene iyong. Eyei itwaan idio ni aanyu ngichan nakanuan tarai nyesechit ngesi a? Kori eyakasi lu etenooko lu abukorosi a?

⁸Engolik ayong ngitunga echilete ngamanat a aronis sodi kitakis aronis loger a ngikinyam. Elemete tokona kesi ngakiro naaronok.

⁹Inyasuni Akuj kesi a akianget keng, sodi tomunya a angoit keng.

¹⁰Irurumaate luaronok loger a engatuny alokaadengan, nakaneni isililingi Akuj kesi topwanyipwanyaa ngikel kech.

¹¹Etoakete kesi loger a engatuny alo engopikini etiengit eari tanyam. Etoakete kesi kongina topetaros ngide kech.

¹²“Akolongit apei, kengaingaakinio ayong ngakiro nakit, katolimokin akiroit imunonitae noi.

¹³Kichan ibore ngini ngaju kang loger lo irujaa iyong.

¹⁴ Abu ayong katobul atamaranik. Tamaranik akwaan kang daang ani kabulitor.

¹⁵Tokutak akatorot ereet kang, nabo keil topukia akwaan kotere ebuloi.

¹⁶Towo ibore alongaren kang. Atokienyik ayong atowou bo akiyen. Achakina ibore ngini chek. Ani erumor eira etoil elimuni tama,

¹⁷“Epedori itwaan dir aliwor ni etenoono ani a[6] Akuj a? Epedori itwaan dir aliwor ni ikiuna ani a[7] Akasubunan keng a?

¹⁸Nyemuno Akuj tani ngikasubak etich keng lua adis. Eanyuununi ngesi akisech tani alomalaikae keng.

¹⁹Esibit iyong emuno ngesi itwaan ni erai lochoto esubunitere a? Ibore a apua ni epedorio akipudaar loger a ngakimam a?

²⁰Enyouni itwaan nataparach peedeaka. Ani enangi ebong, totoan atipei peeyenio.

²¹Tolemarae ngiboro keng daang. Totoan ngesi pearai ekooson.”