Read turkana Yob 40 Bible Online

Yob 40 - turkana bible

Yob 40

¹Torubak Ekapolon Akuj isuruori Yob tama,

²“Yob, abe isaki iyong abolo ka Akuj Naationon. Ilimuni tokona iyong atamar kidwang kori eyakasi ngakiro itachakini Akuj?”

³Abu Yob tatachak Ekapolon Akuj tama,

⁴“Kingolik a, emam itwaan kemarit ayong. Anukiro katachakini ayong iyong? Abunakini ayong akituk.

⁵Alimu ayong nakaalak napeajoikinit alimuni.”

⁶Sodi kisuruorik Ekapolon Akuj Yob nabo alokuwam alo ipiripiri tama,

⁷“Tonyou tokona towo lokile, tatachu ngakiro nakengisi ayong iyong.

⁸Isaki tokona iyong atamar nyetiriyanit ayong ngakiro na asubi a? Isaki iyong atamar asechit ayong, nyiisechite iyong a?

⁹Igogong iyong kwa ayong a? Ipedori iyong agirokin loger kang a?

¹⁰“Ani kikote neni, towo chene engolikisi iyong anarimatoi kon ka ekisil. Kidodiun anakibuseanu kon ka ajokis.

¹¹Tokienyik ngitunga lukenisak. Tangau robo anyunyura kon kitiditeu kesi.

¹²Ee robo, tokienyik kesi sodi kitiditeu. Kichiak luaronok ani ewaatar.

¹³Tonukak kesi daang nalup. Tonukak kesi ni eyakasi ngikatoak.

¹⁴Sodi toliwor ayong esiauni akipuruun iyong. Atolim atamar iyong ilope idwangi.

¹⁵“Tokienyik tani etiengit lo enyaritae epir. Asubuni ayong loger lo kasubea iyong. Edak ngesi nginyia loger a aite,

¹⁶nakaneni etioko ngikilinga a akwaan keng, ani ngamori a akwaan keng, egogong.

¹⁷Itenara ekosim keng loger a echekereng. Ani ngaputon a ngakalokidingo keng, etokokino wapei.

¹⁸Ikote ngakoyo keng ngasua nanyangayek, kikote ngakejen keng ngasua nakirionok.

¹⁹“Erai ngesi kitalari noi alotieng kang kadaang! Akasubunan keng bon epedori akidwang ngesi.

²⁰Nginyia lu itanere ngesi, erupunito alomukur alu eboliata ngitieng a moding.

²¹Inapakin ngesi kwap aregae, toduk anatiriwae ani erai erus.

²²Ngirega ka ngikito lu erupunito alokipetot a ayanae kesi imukito kesi a etolim kech.

²³Nyekerit ngesi angolol na ileleba. Ililingi ngesi chek. Tani na ilelebunor angolol a Yorudan kipichun.

²⁴Ngae epedori akitumudukan ngesi ani erumor kirum ngesi? Kori ngae epedori akiped ekume keng a eloit?”