Read turkana Yob 41 Bible Online

Yob 41 - turkana bible

Yob 41

¹ Ipedori iyong akisurum Lepiasan[34] a ekorobich a? Kori ipedori iyong akien angajep keng a auno a?

²Ipedori akirepakin auno lokume keng a? Kori akiped ekitinyo keng a ekorobich a?

³Kimaimai ngesi iyong ebala kimiekinae a? Ekoe, kisuruori ngesi iyong ngakiro nakaabok a?

⁴Ekoe, ichamakinosi iyong ka ngesi kichikak iyong atamar asubi etich kon jik a?

⁵Iboliasi iyong ka ngesi loger lo iboliata ka ikeny a? Kori iratakini iyong ngesi toliwor eboliatar ngakedalak kon?

⁶Epegakinosi ngimuchurus kotere ngaropiyae na egielere ngesi a? Etubitubete ngimuchurus ngesi togielanasi a?

⁷Ipedori iyong akileleb amuny keng lorimocha lu eremere ngikolia? Kori ipedori iyong akirem akou keng a erimoch aloapolon eremere ngikolea?

⁸Ani kitap iyong ngesi, iyenuni iyong ekilek lo emini. Nyibongokini nguna nabo jik.

⁹“Itwaan daang ni ingolikini Lepiasan, elilimiyori tadakakin kwap.

¹⁰Emam itwaan epedori akiteriangakin ngesi. Ani ngae tokona epedori aweikin ngesi?

¹¹Ibore a ngae alema ayong ejoikinit atachakini ilope? Erai ibore daang ni eyei kwap adis ikang.

¹²“Kimiek katolimok ngakiro a nginerin a Lepiasan. Kesisak eger lo epoloo ngesi tarai lokaagongon.

¹³Ngae epedori abuluchiar amuny keng? Kori ngae epedi aupwal keng a ejie?

¹⁴Ngae epedori angaar akituk keng? Ileleba akituk keng ngikel lu kitubulete!

¹⁵Eyakasi ngangedakinet a ngaupwala naabor[35] keng na etokokino wapei togogong loger a amoru.

¹⁶Etokokino daang wapei emam tani ni epedoror ekuwam.

¹⁷Irumeikina apei ni eyei nache emam kona etiakio.

¹⁸Imauni akicha na ikarisaarea ngesi. Enokete ngakonyen keng loger a akolong ana ipiripiruunit.

¹⁹Epuduunete ngakinwaket na enokete anakituk keng. Kiteraros ngikatwany a akim nikalapatan.

²⁰Eneteunun apuru alokume keng loger a apuru ana epuruunit alodoan alo enomit akim alokwap amot.

²¹Itonokuni akienget keng ngatotol. Kiwaru asarae anakituk keng.

²²Egogong emosiring keng noi erai lu iriamete ka ngesi daang ebuli.

²³Edupup ngamori keng lokojokon. Egogong ikote asuat.

²⁴Etiono etau keng ikoni amoru nakaagongon. Egogong ikoni amoru nakiries.

²⁵Na enyounio ngesi, tobul ngikajwok. Ebuli kesi tongop kona ikokinete.

²⁶Emam ekileng ewani ngesi. Emam akwara, kori emal, kori erimoch ewani ngesi.

²⁷Enonok asuat anikeng ikoni nginyia. Ani asuat nanyang, ikoni akitoe naabosan.

²⁸Nyitamatari ngesi emal. Ani kibiirokin ngesi ngamoru, kitusub ngisul a amelu.

²⁹Ikoni esebo anikeng akasirimait. Ekianar ngesi ngitunga na eremioto ngesi a amorok.

³⁰Amuny na erapit akook keng ikoni ngakabelebele naitayek. Echilete kesi ngalup kiealasi loger a iborosit ani iriere.

³¹Itukulae ngesi nituluk loger a amot, toliwor ekui loger a amot a akimiet.

³²Ani itori ngesi ni itori, idongi erot keng imaunit, sodi kibele anam toliwor ekurudo.

³³Emam ibore iche ikwaan ka ngesi anakwap. Erai ngesi etiengit lo emam ibore eemit.

³⁴Imenyarit ngesi tani ngitieng lukenisak. Ngesi epolokinit ngitieng a moding daang.”