Read turkana Yob 42 Bible Online

Yob 42 - turkana bible

Yob 42

¹Abu Yob tatachak Ekapolon Akuj tama,

²“Ekapolon Akuj, ayeni ayong atamar erai agogongu daang akon. Ayeni atamar ipedori iyong akisub ibore daang ni isaki.

³ Kingit iyong ayong ibala, ‘Ngae iyong itoniarit aosou kang a ngakiro anapasiyek?’ Ngakiro nguna kesi alimunio ayong napeayeni, na araakasi ngakiro nakitalarete lokojokon, nakakuruwori ayong akiyen.

⁴Ibu iyong kitolimok ayong tama, ‘Topupok, katolimok. Kengisi ayong iyong ngakiro sodi tatachu iyong.’

⁵Apupi kolong ayong ngakiro kon a akit, nakaneni kengolik tokona a ngakonyen.

⁶Kotere ngakiro nguna, keruma ayong ngileech kotere daang na alimuni. Alungi tokona ayong akisech kang ewasakin apua ka ekuron.”

⁷Ani kiruor Ekapolon Akuj ka Yob kerumor, tolimok Akuj Elipas tama, “Angoit ayong anikon ka talopaekon luarei kainyo nyiruoro esi ngakiro na iteni anikang loger lo eruoror ekasuban etich kang Yob.

⁸Torujasi tokona ngimongin ngikan-kaarei ka ngimesekin ngikan-kaarei nia Yob, tolemut eraakasi ngakipeyos kus na ipeyeo. Kilipakini Yob esi sodi eik ayong ngakilipasinei keng, nyakasubea esi ngakiro na itemem ka abangaanut kus, kainyo nyiruoro esi ngakiro na iteni anikang loger lo eruoror ekasuban etich kang Yob.”

⁹ Apot Elipas, ka Bilidad ta Sopar tosuba ngakiro na alimokini kesi Ekapolon Akuj. Kiik Ekapolon Akuj akilip a Yob.

¹⁰Ani kilipak Yob ngipaalon keng luuni kerumor, tobuak Ekapolon Akuj Yob ebari keng daang, nak ngainakinet ngaarei a ibore kadaang anisek arai ikeng.

¹¹Pot talokaatokeng, ka tanakaatokeng ta daang lusek anaikina ka kesi, kimuja ka Yob anawi keng. Apot kidodikis kesi ngisien ka akisililing ngesi kotere ngichan daang lu etaanyuni Ekapolon Akuj ngesi. Tolem ipei kech daang ngaropiyae ka ekababaat a egolit nak Yob.

¹²Topia Ekapolon Akuj eboyor a Yob lo ekisidi akidwang eboyor keng lo ekingaren. Araakasi ngibaren keng ngirwa ngulu ngamesekin 14,000, ka ngikaala 6,000, ka ngaatuk 2,000 ta ngisikiria 1,000.

¹³Ayakasi ngesi tani talokookeng ngikan-kaarei ka tanakookeng ngauni.

¹⁴Nakookeng naapolon, tolimok ngesi ekiro be Yemima. Ani na ngaarei, tolimok ekiro be Kesia. Ani naachi, tolimok ekiro be Keren Apaki.

¹⁵Amam ngaberu ngache anakwap etia ni etia na edwangito tanakookeng a Yob anakibuseanu. Kimiekinea apakech kesi ebari keng kiruma ka talokaatokech aapei.

¹⁶Ekisidi kanguna, torubak Yob eyari a ngikaru a amiat a apei ka ngitomwon-omwon. Abu ngesi taanyunga ngitatae keng, tanang alesit na nguomwon.

¹⁷Abu ngesi totoan emojongit noi.