Read turkana Yob 5 Bible Online

Yob 5 - turkana bible

Yob 5

¹Yob, kirema chene taanyu keyei itwaan iikini. Eyei emalaikat edio lo epedori akingarakin iyong a?

²Iteni eari akichana ekabangabangat, nabo eari etereku ekawaiwaat.

³Engolik ayong ngikabangabangae isikokinosi nakaneni elam ayong ngawiyei kech atipei.

⁴Nyiboikinosi talokookech akaalimon. Ipudaario kesi alokidor, emam itwaan enyouni toik kesi anitubet ngakiro.

⁵Ngulu enyamit akoro, enyamete ngalemet a ngikabangabangae. Enyamete tani ngikinyam lu echakakinosi lookwa. Ani ngulu enyamit akure, iterekuyarit ebari a ngikabangabangae.

⁶Nyerupuuniyete naaronok analup, kori nyerupuuniyete ngichan analup.

⁷Erai itwaan ilope elemuni ngichan keng, loger a ngikatwany alu iteruunosi anakim.

⁸“Arai tarai ayong, kasak Akuj, sodi atolimok ngichan kang.

⁹Nyikipedori ngoni akiyen ngakiro nakatalarak esubi ngesi. Ani ngakitoodikinet nakailiilok keng, nyesalunete.

¹⁰Eyauni ngesi akiru nakwap, tobukok ngakipi namanat.

¹¹Akuj ikeuni lupalag, nak lu esutonokinete daang alakara.

¹²Epetari ngesi na ereto ngikamodeanak, nyeesubakinotor na esakete kesi.

¹³ Irumununi ngesi ngikoosok anakiro ana ereto, kisalu ngakiro a ngikamodeanak atipei.

¹⁴Iteete kesi aribu naparan, ani naparan lotingilan, itwapitwapete loger a akwaar.

¹⁵Nakaneni eyuuni Akuj ngikebootok anakitu. Eyuuni lu ichanasi nyiichiakiar.

¹⁶Isigienokini ngesi ngikebootok, ani luaronok kisililingae.

¹⁷ “Talakar itwaan ni ikilakini Akuj Naationon! Wara robo nyiimenya ngakiro nakikilakinea Akuj.

¹⁸Iturupuni Akuj ngajemei anitwaan, ani erumor toen. Ewani Akuj itwaan, ani erumor kitangalek.

¹⁹Kiyuununi ngesi iyong jiik nyikiwan.

²⁰Ani emini eron a akoro, kiratakini iyong anakitu. Ani ngirwa lu ejie, kiyuuni anakwara.

²¹Kiyuuni iyong Akuj aloswamit. Kiyuuni ngesi iyong na eponeta nginyas.

²²Ani epote nginyas ka akoro, ikieni iyong, kori nyikeri iyong ngitieng lukaadengak.

²³Engopete ngamoru anamanat kon. Ichamunosi ka ngitieng lukaadengak.

²⁴Iboikin iyong nawi kon akaalimon. Ani iisi ngibaren kon, irukauni daang eyakasi.

²⁵Elalakearosi ngide kon. Ee robo, elalakearosi noi totiata asepich a ngimases.

²⁶Itoani iyong kitonuk imojongit noi. Kikok ngakanoi na eramio ngirwa lu elemere.

²⁷Yob, kisoma sua ngakiro nugu nikooyen kiyen. Topupok ngakiro nugu toyen, kingarakinete iyong.”