Read turkana Yob 7 Bible Online

Yob 7 - turkana bible

Yob 7

¹Erai eboyor a itwaan anakwap eka ekilek jiik. Ikoni eboyor lo esubere etich loationon.

²Ikoni ngesi ekedalan lo imuit etolim. Ikoni ekasuban etich lo idarit ngaropiyae na itanyamio.

³Ngilapio daang, emam ibore egieno ayong. Ngakwaarisea daang, ariaba ayong.

⁴Na enapakinor ayong, engis abala, ‘Ekoe, ori anyounio!’ Nakaneni nyiwalari atipei. Ebelobelo ayong akwaar kiiya agasi atamar tabaiya.

⁵Ileleba ngikur ka elos nakwaan kang. Ebutakina loper nakwaan kang. Eropiyete ngabulon anajemei kang.

⁶Ekerete ngirwa kang akidwang tani acheran na edonyere. Emam ibore egieno ayong alorwa kangulu.

⁷“Ee Akuj, kitam atamar erai akiyar kang ekuwam. Adaun kolong alakara kang.

⁸Kitee iyong ayong tokona, nakaneni nyikianyungari nabo. Ani kisak iyong ayong, atongopiarite ayong.

⁹Loger a edou alo etoaniari tongopia, ikokini itwaan ni etoani tolot lokatoak neni.

¹⁰Nyebonguni nabo itwaan ngini nawi keng. Nyeringa nabo ngitunga daang lukolong arukitotor ngesi eyenete ngesi.

¹¹Kotere nguna, nyelilingi ayong! Angoit ayong ariaba. Eburakini ayong kotere ngakiro nakanomito etau.

¹²Nyo eringa iyong kiyokiyo ayong? Esibit iyong arai ayong etiengit a anam[8] a?

¹³Ani alimuni ayong atama, ‘Eangari ayong alokitanda kang. Kesianguni aperiet kang ayong aloburas kang.’

¹⁴Nakaneni kitoem iyong ayong kotere akirujare, Kitubul kotere ngakisingolikinet.

¹⁵Tanang atiakuni ayong amiadakin, atotoan akidwang akiboi alochan kalu.

¹⁶Kakadaki ayong eboyor kang kainyo nyayari jik. Kimiekinae! Kainyo ikote ngirwa akianget.

¹⁷ Nyo kijoikinit iyong anitwaan? Nyo imisitor iyong ngakiro na esubi ngesi?

¹⁸Ingichit iyong ngesi ataparach daang, iningit ngesi adakikat daang.

¹⁹Nyingoliari iyong tani wache wadio, kimiek eliko tani ni erai ngakimul a?

²⁰Iyong eketeon ngitunga, ani kasech ayong, ikokini akisech ngina kiwani iyong ai? Nyo kitiliworea iyong ayong ni egumanakinio ngimalea kon? Kaliwor kolong ayong eegos loapotion noi anikon a?

²¹Nyo kolong peirimakinea iyong akisech kang? Ikwa nyikisari iyong aronis kang a? Nipei bore en, amini ayong naliel kang, ilomari iyong akisak ayong, nakaneni angopi ayong!”