Read turkana Yob 8 Bible Online

Yob 8 - turkana bible

Yob 8

¹Abu Bilidad lo abunit alo Chua, tatachak Yob tama,

²“Irubakini iyong iruoro ngakiro nguna tanang ori? Ikote ngakiro kon ekuse a ekuwam aloapolon.

³Esibit iyong ibatanari Akuj na eriyan a? Epedori Akuj Naationon akibatar ngakiro na iyookino a?

⁴Kesechakinito tokona kolong ngide kon Akuj dir, ngakiro nguna emiekina Akuj kesi anaronis kech.

⁵Ani kisak iyong Akuj, kimaima ngesi na erai Akuj Naationon,

⁶tarai iyong lo nyisechit tarai lo itenoono, ebuni Akuj kingarak iyong, kitojok nabo ngakiro a awi kon.

⁷Ebari daang lo abukor anikon edit. Elalaar ebari lo kiinakini iyong Akuj ekisidi.

⁸“Kitama mono iyong aosou nakolong a angorot. Kitama ngakiro nakolong aanyunete taapaayok.

⁹Kirai ngoni ngitunga lubeen aringa kidounio, emam ibore kiyeni. Kitorit ngoni nakwap naga loger a etorube.

¹⁰Kimiek ngikoosok lu ngorot kitatam. Topupok ngakiro kech na aosou.

¹¹‘Nyerupunete ngitiriwae ani emam ngakipi. Nyekilikiluunete kesi ani echadakina alorus.

¹²Ani ijiwarete ngakipi, isiaunete ngitiriwae tooko, eringa edisiak emam ibore esubakinere.

¹³Ikote ngitunga lu nyekerito Akuj ngitiriwae ngulu. Engopi ibore igienosi kesi, na eisikineta Akuj.

¹⁴Igienosi kesi iuno, igienosi akai a asimokok.

¹⁵Ani kegongakinosi kesi kai a asimokok, igangi akai ngina kesi a? Ani kerwakinosi kesi iuno a, igangi kesi towaatar a?’

¹⁶“Erupete ngitunga luaronok loger a edoan alo imakinit akolong, loger a edoan alo ialakina mana wadaang.

¹⁷Engichakinosi ngaten kech namoru, totinga ataaba daang.

¹⁸Nakaneni ani erutunio kesi, tosub pekeyakasi kolong neni.

¹⁹Ee, alakara a ngitunga aluaronok daang ngina. Epote luche pena nisek ayakasi kesi.

²⁰“Nakaneni nyengeri Akuj ni emam akisech, nabo nyingarakini luaronok.

²¹Kimiekini ngesi iyong tokieni kimaritete.

²²Nakaneni ngulu kiremokino iyong, isurumi ngesi ngileech. Epuripuriakinosi ngawiyei aluaronok.”