Read turkana Yob 9 Bible Online

Yob 9 - turkana bible

Yob 9

¹Ani erumor tatachu Yob tama,

² “Iteni dir ayeni ayong atamar ikote ngakiro neni. Nakaneni ikokini itwaan idodiuni ani a Akuj atamar eriyan eboyor keng ai?

³Ikokini itwaan epegasi ka ngesi ai? Epedori ngesi akingis ngakiro abunget apei na emam ikatachunan.[9]

⁴Eos Akuj noi totiono. Ngae mono aweiki Akuj tama epiyo ngesi Akuj?

⁵Isiyotonokini ngesi ngimoru nyelimuno sek. Toukono ngesi engoit.

⁶Eyaununi Akuj amaranikin a akwap, kitamaranik ngalup. Itirikirikokini ngesi ngapirio na itoweito akwap.

⁷Epedori ngesi akiratakin akolong nyiipiripiruu, ani ngikanyer nyiimaut nakwaare.

⁸Akuj kolong bon apetakini adis, topolok anam.

⁹ Akuj ngesi enenekini ngikanyer nadis. Lu enyaritae etom loapolon, ka ngikarikok, ka ngakanyer, ta ngikanyer lua lokuju.

¹⁰Nyikipedori ngoni akiyen ngakiro nakitalarete na esubi ngesi. Ani ngakitoodikinet keng nakailiilok, nyesalunete.

¹¹“Epedori Akuj akitorun diyete kang nyaanyunga ayong. Ani erumor tolot wache peayeni ayong.

¹²Elemari ngesi ibore ni esaki, nakaneni emam itwaan iratakini ngesi. Emam itwaan epedori akingit ngesi tama, ‘Nyo isubi iyong?’

¹³Nyiratakini Akuj angoit keng. Amunyari ngesi ngimoe keng lu engarakinete etiengit a anam lo anyaritae Raab[10] aweikin Akuj.

¹⁴Ekokini tokona ayong atachi ngakiro a Akuj ai? Nyaai ni aanyunea ngakiro na alimuni?

¹⁵Tani kemam ayong akisech, emam kona atachi ngakiro keng. Erai anikang idongit akilip Akuj na erai akeriran kang atamar kesien.

¹⁶Tani kanyara ayong ngesi kiki, esibit ayong nyepupokini ngakiro kang.

¹⁷Emeuni ngesi ngikuwamea katowana ayong, kitalala ngajemei kang akiding pas.

¹⁸Nyekemiekini ngesi ayong tani eangak. Eleleb ngesi anyunyura loboyor kang.

¹⁹Eyei ibore etingakini ayong Akuj a ekileenu kang a? Ani kisak iyong kitotubokin na eriyan, Ngae itonyouni ngesi tolot nitubet ngakiro?[11]

²⁰Tani kemam ibore asechit ayong Keriraate ayong ngakiro kang Esibit ayong kerirae ibore daang ni alimuni ayong.

²¹Emam ibore asechit, nyamisit ayong akiyar kang. Aremokino ayong eboyor kang.

²²Emunyari Akuj lukasechak ka lu nyesechito aapei. Eraakasi nguna daang ngapei anikeng.

²³Ani etoani itwaan ni nyesechit atipei, tokieni Akuj.

²⁴Ainakini Akuj ngitunga luaronok akwap. Kitumudukan ngikatubok ngakiro daang. Ani pekerai Akuj asubi nguna, ngae iche asubi?

²⁵“Ekerete ngirwa kang. Eroko ngirwa ngulu daang.

²⁶Ibiroro ngirwa kang loger a emal. Epiraka ikote egole lo ibiriuno kwap ni eyei apoo.

²⁷Ani kalim atama, ‘Emiekini ayong akiburare. Ajongoe ayong asinyit, atoliwor alakara.’

²⁸Kabulit ayong kotere ngichan kang daang, kainyo ayeni ayong atamar kemarunit ayong Akuj atamar asechit.

²⁹Ani keriratae ayong atamar arai ekasechan, nyo echanar ayong pas?

³⁰Emam esabuni ilotari akisech kang.

³¹Kachakakini Akuj ayong nakipany a ekabose. Irumete ngiworui kang daang ngileech kotere ayong.

³²Arai tarai Akuj itwaan, katach ayong ngakiro keng. Kilot nitubet ngakiro kitotiek kaneni.

³³Nakaneni emam itwaan engichakin kiding kosi, kitotiak ayong ka Akuj.

³⁴Akuj, tojongo akirirare ayong. Tolema ngakiro naketubulito ayong.

³⁵Ani kikok neni, kiruoro ayong ka iyong peaemit, kainyo nyakabuli ayong alongaren kon.”