Read turkana Ngieosio 10 Bible Online

Ngieosio 10 - turkana bible

Ngieosio 10

¹Nyo iwaar iyong anialonan, Ekapolon Akuj? Nyo idukeenea iyong nakitingeta sua ngichan?

²Iwogasi luaronok, toboliatar ngikebootok. Kimiekisi ngiloi lu esubete kesi kiruma kesi ngikulepek.

³Iwoga itwaan niaronon kotere etereku keng loaronon. Ani ngini iterekuyarito ngiboro, ichieni Akuj pas engerit.

⁴Nyemisit itwaan niaronon Ekapolon Akuj. Iwoga ngesi ebala, “Emam Akuj.”

⁵Ejok eboyor a itwaan aniaronon jiik. Nyepedori ngesi akiyen ngakiro na etubuni Akuj. Imenyi ngesi ngimoe keng daang.

⁶Itamanari ngesi ebala, “Nyeketeriangakinio ayong. Analesea kadaang, emam ngichan aanyuni ayong.”

⁷ Ileleba ngilam, ka alioko, ta angata nakituk keng. Ekoponokin ngesi ekiruor ngakiro nakikadakinete naaronok.

⁸Edukit ngesi anadakarin idarit akiar ngitunga lu emam akisech. Irere ngitunga lupalag,

⁹edukit ngesi idarit loger a engatuny. Idarunit ngesi lukebootok. Isurumi ngesi kesi a eloit keng tolema.

¹⁰Erwakinoi nipalag tadakakinae kwap. Edakari amoitanut aluaronok.

¹¹Itamanari itwaan niaronon ebala, “Emuriakis Akuj ngakiro kang. Edaa ngesi ereet keng. Nyeringa nabo kaanyungari.”

¹²Ekapolon Akuj, tonyou kare totub ngakiro a ngitunga aluaronok! Wara nyikimuriakis lu ichiakiaritae!

¹³Ikokini itwaan niaronon imenyi Akuj ai? Abe toliwor itamanari ebala, “Nyekerirae ngesi ayong.”

¹⁴Nakaneni itee iyong lu eyakasi lochan toriabas. Isaki iyong jiik akingaranakin kesi. Kimuno iyong itwaan nipalag. Ingaranakini iyong lukokiok.

¹⁵Tobwang agogongu a ngitunga aluaronok ka ngirukooi. Kirira kesi kotere naaronok esubete, nyeesuba nabo.

¹⁶Erai Ekapolon Akuj ekapolon jik. Ngibukui lu nyilipito ngesi engopiarete anakwap keng.

¹⁷Ekapolon Akuj, ipupi iyong akigoro a itwaan ani itiditeuna. Ipupokini iyong ngakiro keng kitogogong.

¹⁸Iirari iyong akigoro alu ichiakiaritae ka lukokiok. Isubakinea iyong kesi ngakiro na esakete tongop itwaan iteriangakini kesi.