Read turkana Ngieosio 102 Bible Online

Ngieosio 102 - turkana bible

Ngieosio 102

¹(Akilip a itwaan ani eyei lochan, ani igoronokini Ekapolon Akuj) Kiira akilip kang Ekapolon Akuj, tanangu akigoro kang nikon.

²Nakatingeta ayong ngichan, nyikimulen ayong! Todeta akit kon, kiira napei kelipea!

³Eporito ngirwa kang loger a apuru. Eriraate ngakoyo kang loger a akim.

⁴Kepudaar ayong loger a nginyia aoniyo. Ketuuriyorit ibore akimuj.

⁵Kotere akunua na ariabar, kekar ayong edong ngakoyo make.

⁶Ekok ayong atarukot a ariet. Ekok ayong tula na eyei nauyongorot.

⁷Kekolerit ayong loger a ikeny ani ewei alopei alokidiama akai.

⁸Keyenyete ngimoe kang akolongit daang. Ngulu kakianatar ayong, ekiro kang ngesi ilameta luche.

⁹Aliwor ekuron akimuj kang. Emorik ayong ngakiyo kang ka ibore ni amasi.

¹⁰Kotere anyunyura ka angoit kon, kirum iyong ayong kitachaka nikalonan.

¹¹Ikoni eboyor kang etorube loka ebong. Aoniyo ayong loger a nginyia.

¹²Nakaneni, iyong Ekapolon Akuj, ngesi irai ekapolon lokajik.

¹³Inyouni iyong kisieni Sion, kainyo anang esaa lo idodiunea iyong ngisien anikeng. Etemokin esaa ngolo.

¹⁴Eminasi ngikasubak etich kon Sion, tani kinyasunitae. Isienit kesi tani keliwor asakatan.

¹⁵Ekerete ngibukui Ekapolon Akuj. Ekerete ngikapolok daang anakwap agogongu keng.

¹⁶Ani ebonguni Ekapolon Akuj akiduk Sion, idodiuni apolou keng.

¹⁷Iirari ngesi ngakiro a ngitunga keng alu nyemisitae, topupok akilip kech.

¹⁸Kigir ngakiro nugu kotere ngalesea na isidiunosi. Ngitunga lu idounio ekisidi, ipuruunete Ekapolon Akuj.

¹⁹Engoliuni Ekapolon Akuj alokidiama ani italeuno, kingoliu kwap na ayakar nadis.

²⁰Abu kiira akunua alu eenitae. Talachak lu alimunitoe atamar taara.

²¹Elimorio ekiro a Ekapolon Akuj alo Sion. Ipuruunio ngesi alo Yerusalem,

²²na echunakinotor ngibukui ka ngapolon kilipa Ekapolon Akuj.

²³Ebula Akuj ngikilinga kang eringa asorokona. Etikidieku ngirwa lu ayarea ayong.

²⁴Abala ayong, “Ee Akuj kang, nyikilema tokona eringa asorokona. Ee Ekapolon Akuj, ibooyi iyong nakajik.”

²⁵ Isubakini kolong iyong akwap a angorot. Isubakini adis a ngakan kon.

²⁶Engopiarete kesi nakaneni irubi iyong jik. Edaudaunosi daang loger a ngiworui. Ilochi iyong kesi loger a ngiworui, tachakarae tongopiasi.

²⁷Nakaneni idongi iyong ikoni neni jik, nabo nyedaun ngikaru kon.

²⁸Ngide a ngikasubak etich kon, ibooyete akaalimon. Isikokinosi ngalesea kech alongaren kon.