Read turkana Ngieosio 104 Bible Online

Ngieosio 104 - turkana bible

Ngieosio 104

¹Etau kang, kipuruu Ekapolon Akuj! Ee Ekapolon Akuj, Akuj kang, ipolot iyong noi! Inapit iyong akibuseanu ka ekipur.

²Ilogakina iyong akicha loger a eworu, ipetak iyong adis loger a eam.

³Idukok iyong ni ilomi kidiama ngakipi a adis. Itiliwo ngidowon aurukuk kon. Iporit iyong a ngabeben a ekuwam.

⁴ Itiliwo iyong ekuwam ngimeanara kon, akimilea erai ekasuban etich kon.

⁵Itowo iyong akwap itirok anapirio keng, emam kona isiyotoorio.

⁶Imukok anam kidiama akwap loger a eworu, toburuchiasi ngakipi ngimoru.

⁷Na ikilakinea iyong ngakipi, tamataros. Ani iirarete iyong igirokini, kipungaros.

⁸Toleleasi alomoru totiyaaros nadipoe, tananga ni isaki iyong epete.

⁹Kigerok iyong kesi ekukuor lo nyilamete, nyeeburichiareta akwap nabo.

¹⁰Iteleleu iyong ngileleae anadipoe, sodi kitoro kiding ngimukur eleleete.

¹¹Itaanyunete kesi ngitieng a moding ngakipi. Emaase ngisikiria a moding ngakipi kaneni totuboreta akure.

¹²Edukete ngikieny ngakais kech lokito lu eyakasi neni, todoto naten kech toeoto.

¹³Alokidiama, itarami iyong akiru lomukur, kileleb apiaro kon nakwap.

¹⁴Iturupuni iyong nginyia kotere ngibaren. Kiturup ngalemet kotere itwaan taanyunea ngesi dang akimuj anakwap.

¹⁵Taanyunea itwaan emuna lo italakari, ka akimiet a ngikito na epwatuni ereet keng, ka akimuj na eanyunea ngesi ngikilinga.

¹⁶Ngichekereng a Lebanon, eanyunete ngakipi nakaalak. Ee robo, ngikito a Ekapolon Akuj, lu etakini ngesi.

¹⁷Edukete ngikieny ngakais kech neni, Todokito tapelekuto ngikito ngulu.

¹⁸Ngimoru lukooyak emechete ngatirikiki. Ani ngadukae, edukete anatabab.

¹⁹Isubak iyong elap atoyeneta sua ngikaru. Eyeni akolong esaa lo edooyorea.

²⁰Isubakini iyong akwaar, ani eribokini, topudut ngitieng a moding daang.

²¹Irurumaate ngingatunyo lusorok irikaate, esakete akimuj na einakini Akuj.

²²Ani ipiripiruuni akolong tobongosi kesi, kinapakinos naduon kech.

²³Ani erumor tonyout ngitunga toloto akisub etich kech tanang ebong.

²⁴Ekapolon Akuj, isub iyong ngiboro lukaalak! Isub iyong kesi daang a aosou! Ileleba ngiborei kon lusubuna nakwap.

²⁵Eyei anam ama, epolot tabalany. Eyakasi ngiborei neni lu nyimarun. Ngiborei lu eyarete, luapolok ka luuchik.

²⁶ Iwaarosi ngatubwae naapolok ananam. Ichuro Lepiasan ananam kangina. Lepiasan ngesi Ekipe a anam lo kolong isubi iyong.

²⁷Kigienosi iyong ngiborei daang, esakete nak kesi akimuj na iitanito.

²⁸Irapete kesi ibore daang ni iinakini iyong. Ani ingaari iyong akan kon, kimwoko kesi.

²⁹Ani imuki iyong ereet kon, toema kesi. Ani ilemari iyong akienget kech, totoaka kesi, tobongosi napua na kolong asubunere.

³⁰Ani ikutakini iyong kesi akienget kon, toyara nabo. Ilotari iyong ereet a akwap tokitetenu.

³¹Akibuseanu a Ekapolon Akuj torup jik. Ejoikinito Ekapolon Akuj ngitichisio keng a ilope.

³²Ingolikini ngesi akwap, tamaranik akwap. Etapi ngesi ngimoru, totulakanyuut apuru.

³³Aeonokini ayong Ekapolon Akuj ngirwa daang lu ayarea. Ngirwa daang lu ayarea, epuruuni Akuj kang.

³⁴Ekapolon Akuj, kimiek na etamanari ayong kitojoikis iyong, kainyo ebunit alakara kang anikon.

³⁵Kimiekisi ngikasechak kirikarae anakwap, tongopa ngikasechak totorokinos! Etau kang, kipuruu Ekapolon Akuj! Ekapolon Akuj kipuroe!