Read turkana Ngieosio 105 Bible Online

Ngieosio 105 - turkana bible

Ngieosio 105

¹Tobuakisi Ekapolon Akuj alakara, tolimosi apolou keng. Tolimokisi ngibukui ngakiro na asub ngesi.

²Toeokisi kipuruut Ekapolon Akuj. Tolimosi ngitichisio keng lukatalarak!

³Epuruutu ekiro keng lo italeuno. Kimiekisi ngitai alu esakete Ekapolon Akuj talakaros.

⁴Tasaka Ekapolon Akuj ka ngikilinga keng. Tasaka atamar toyei ngesi nikus jiik.

⁵Kitamutu ngitichisio lukatalarak asub ngesi. Kitamutu ngakitoodikinet nakailiilok, ka ngakiro na atubi ngesi.

⁶Kitamutu nguna, esi ngalesea a Aburaam, alo erai ekasuban etich keng, ka ngalesea a Yakobo na aseu ngesi.

⁷Ekapolon Akuj erai Akuj yok. Eyakasi ngakiro na atubu ngesi akwap wadaang.

⁸Irichakini ngesi achamunet keng jik. Iyoonokini ngakichiket keng analesea kadaang.

⁹ Irichakini achamunet na kolong achamakin ka Aburaam, kiyook akichiket na kolong ekongi ani a Isaka.

¹⁰ Achamakin Ekapolon Akuj ka Yakobo achamakinet na erubi jik,

¹¹ebala, “Kainakini esi akwap a Kanaan, eliwor akwap ngina akus a ngikulepek.”

¹²Akidioko ngitunga a Akuj, emam itwaan abilit lomoyo, araakasi ngipeyok anakwap a Kanaan.

¹³Awowooto kesi atubonorosi napei alobukut a epei tanang loche. Atubonorosi anapolou a apei tanang nache.

¹⁴Emam itwaan abu Akuj kimiek ichiakiari kesi. Kikilak Akuj ngikapolok kotere kesi

¹⁵ ebala, “Nyiitap ngikasubak etich kang lu eseunitae. Nyiiwan ngikadwarak kang!”

¹⁶Ayauni Akuj akoro nakwap kech, kinyasu akimuj kech daang.

¹⁷Nakaneni amearit sek itwaan engareniyorit. Itwaan ngini ngesi Yosep losek agialario inaa erai ekedalan.

¹⁸Aenio ngakejen keng a ngiriko, toinikinae ngasua nalangir lomosiring,

¹⁹tanang ngakiro nasek adwari ngesi iyookin. Kidodiu akiroit a Ekapolon Akuj atamar araakasi ngakiro keng ngaka iteni.

²⁰Todung ekapolon a Misiri atamar talachakinae ngesi. Talachak ekapolon a ngibukui ngesi.

²¹ Kitiliwo ekapolon ngolo ngesi ekapolon a awi keng. Kitiliwo lo epolokinit ngiboro keng daang.

²²Torikio ngikapolok a arieng keng luuchik ka akitatam ngikasukou keng achwaanu.

²³ Kikokis Ngisirael elomarete Misiri neni. Toliwor Yakobo epeyonon anakwap kangina.

²⁴Nak Ekapolon Akuj ngitunga keng ngide lukaalak. Kitogogong kesi noi akidwang ngimoe kech.

²⁵ Toree Akuj ngitai a Ngimisiri toremokinos Ngisirael. Tomodeaketa ani a ngikasubak etich keng.

²⁶Ani erumor tomea Akuj Musa lo arai ekasuban etich keng, ka Aron lo aseuni ngesi.

²⁷Kidodiunut ngakiro nakatalarak a Akuj alotunga a Misiri, ka ngakitoodikinet nakailiilok alo Misiri.

²⁸ Tomeu Akuj aribu nakwap, nakaneni tongero Ngimisiri ngakiro keng.

²⁹Kibele Akuj ngakipi a ngangololin kech toliworos ngaakot, taara ngikolea kech daang.

³⁰ Kilelebunos ngakidodoka nakwap kech, kilelebunos tani kai a ekapolon.

³¹Kiruorik Akuj tobwangun ngasepicho a ngichuch, pena ngikatuur nakwap wadaang.

³² Kimik kesi akiru nak ngamoru a akiru, ka akimilea na enwakuni akwap kech.

³³Kinyasu ngimusabib kech ka ngimeyana, tobil ngikito a akwap kech.

³⁴Kiruorik Akuj, tobwangun ngimases, kisuuwau ngitak a ngimases emam ekimar.

³⁵ Tokitosi nikaliban daang anakwap, tomunyasi ngalemet kech daang.

³⁶ Taar ngesi ngide lusapa lu ekingaren alokolea kadaang, ngiuriuna lu ekingaren alotunga a Misiri.

³⁷Ani erumor kipud Ngisirael alo Misiri, tonyout etingito akwangat ka egolit. Amam tani ipei alomacharin kech ni erogoit.

³⁸Aemito Ngimisiri Ngisirael, talakaros kesi na anyounioto Ngisirael.

³⁹ Kimuk Akuj ngitunga keng a edou, ani nakwaare kiwaak akim na inwakuni akwap.

⁴⁰Kilipa kesi,[32] inu ngesi kesi ngalurui. Nak kesi akimuj a adis nakaalan.

⁴¹Apaki ngesi ataaba, toleleut ngakipi. Toleleasi anariet loger a angolol.

⁴²Kitamu ngesi akichikakinet keng na italeuno na echikakini ngesi Aburaam, lo arai ekasuban etich keng.

⁴³Abu ngesi dir kitonyou ngitunga keng a alakara. Apot luseuna keng toeokis kimariteteeto.

⁴⁴ Nak kesi akwap a ngibukui alugelayek. Tolemasi ngamanat ani eyakasi ngikulepek kitiliwosi ngakech.

⁴⁵Ekokini ngesi neni kiwapeta ngitunga keng ngakitatamet keng, ka ngakiro keng. Ekiro a Ekapolon Akuj kipuroe!