Read turkana Ngieosio 106 Bible Online

Ngieosio 106 - turkana bible

Ngieosio 106

¹ Ekiro a Ekapolon Akuj kipuroe! Tobuakisi Ekapolon Akuj alakara kainyo ejok ngesi. Nyedaun amina keng jik.

²Ngae epedori alimun natenoyek daang na asubaki ngesi? Ngae epedori akisisaun ekipur keng daang?

³Epiaritae lu iwapito ngitalio keng, tosubete ngirwa daang na eriyan.

⁴Kitamunae kare cha ayong Ekapolon Akuj, na idodikinea ngitunga kon ajokis. Kingarakinae ayong na iyuunea kesi,

⁵ataanyunea ayong ajakaanut a ngiseuna kon. Atalakaror ayong kotere ebukut kon, ataanyunea ekipur ka ngitunga kon aapei.

⁶Kisech sua loger lo kolong asecheta taapaakosi. Kichwangak sua kisub naaronok.

⁷ Nakolong ayakatar taapaakosi Misiri, apot kesi nyeemisikis ngakitoodikinet nakailiilok a Akuj, kori nyitamuna alalau a ajokis a Akuj. Apot kesi tosechakis Akuj Naapolon Noi alokwaas a anam a Chamu.

⁸Tani ikoni neni, abu Akuj toyuu kesi loger lo kolong echikakinitor, kidodiunea apolou keng naapolon.

⁹Ekilakini ngesi anam a Chamu toon. Kisitor ngesi ngitunga keng ni aonit deu.

¹⁰Ayuuni kesi anakan a ngimoe. Topuunos anagogongu a ngimoe.

¹¹Nakaneni tanyama ngakipi ngimoe kech. Emam tani epei abu kidong.

¹² Apot ngitunga tonupa ngakiro a Akuj. Toeokis ipuruunito ngesi.

¹³Nakaneni kimuriakis kesi ngakiro keng atipei. Tojongoto akigieno akiroit na elimuni ngesi.

¹⁴Toting kesi ekimue loationon anariet sodi kiningo Akuj.

¹⁵ Nak kesi ibore ni asakete, nakaneni kititing kesi edeke loaronon.

¹⁶Toting ngitunga etereku anadakar kotere Musa ka Aron, ekasuban etich a Ekapolon Akuj lo etaleuno.

¹⁷Apot ngalup tapakas sodi kilikosi Dasan, tonuka Abiram ka ngitunga a awi keng.

¹⁸ Totiyaun akim lorukitos keng dang, tonomia asarae ngitunga luaronok ngulu.

¹⁹Tosubakis itaok a egolit alo Sinai, kilipa akuj nasubuna.

²⁰Kilokonyo akibuseanu a Akuj, kitiliwosi eka akuj anasubuna ana erai etiengit lo edak nginyia.

²¹Kimuriak kesi Akuj na erai akayuunan kech, na kolong asubi ngakiro naationok alo Misiri.

²²Asubi ngakitoodikinet naationok anakwap ana Misiri kangina. Tosub ngakiro naketubulok ananam a Chamu.

²³Alimuni Akuj atamar amunyari kesi. Nakaneni Musa bon lo arai eseuna keng, ngesi abu toweik Akuj, kiratak anyunyura a Akuj nyeemunya kesi.

²⁴ Apot kimenyasi akwap naajokon ngina, kainyo peanupito kesi na echikakinit Akuj.

²⁵Kiburata kesi aloeaman kech. Towout akiwap ngakiro a Ekapolon Akuj.

²⁶Kotere nguna, kichikichik Akuj kesi, kikong atamar amunyari anariet,

²⁷ atopeta ngalesea kech lobukui lugelayek, topetakin nakwapea.

²⁸ Ani erumor kimorikinos kesi kilipa Baal alo Peor, tanyama ngakipeyos na apeikinito ngikatoak.

²⁹Kitilileta kesi Akuj a eboyor kech, todeakakinos ngidekesinei luaronok.

³⁰Nakaneni tonyou Pineas kirira lu asechito, sodi totubor edeke ngolo.

³¹Kotere ngakiro nguna, napei analesit a apei tanang nache, imarunitae ngesi jik atamar etenoono.

³² Kitongoa kesi Akuj alolelea a Meriba. Taanyu Musa ngichan kotere kesi.

³³Kitolemasi kesi Musa toliwor ekoponokin ngakiro.

³⁴ Nyear kesi ngibukui luche loger lo adungokinitor Ekapolon Akuj.

³⁵Apot kesi kimorikin ka ngibukui luche, kirokosi eboyor kech.

³⁶Kilipa ngakujo kech nasubuna toliworos ngiloi kech.

³⁷ Taara ngide kech lusapa ka lupesur kipeyokis ngipean.

³⁸Tobukosi ngaakot alu nyesechito, ngaakot a ngide kech alusapa ka lupesur, toliworos ngakipeyos a ngakujo anasubuna a Kanaan. Kinyasun akwap kotere ngaakot nguna.

³⁹Apot toliworos lu nyitaleuno kotere ngakiro na asubete. Toliworos lu nyemunosi Akuj loger a ngikalomak.

⁴⁰ Tonyunyurikin Ekapolon Akuj ngitunga keng. Takadakis ngulu araakasi ngikeng.

⁴¹Abu kiwaak kesi nakan a ngibukui, tarata ngitunga lu eremokino ngikapolok kech.

⁴²Kichiakiasi ngimoe kech, topolokinoe a ationis.

⁴³Toyuu Akuj ngitunga keng ngayuunet nakaalak, nakaneni toseut aliwor lukechanak. Tobosiasi kesi kotere akisech kech.

⁴⁴Tani ikoni neni, na eirarea Akuj akigoro kech, abu tomisik ariaba kech.

⁴⁵Kitamu achamunet keng kotere kesi. Tapataner itemem ka alalau a amina keng ana nyedaun.

⁴⁶Kitiliwo ngesi daang lu etusubete kesi etich, lu isienito ngitunga ngulu.

⁴⁷Toyuunae kare Ekapolon Akuj na irai Akuj kosi. Tochununae sua alobukui kitochunak wapei, atobuakineta iyong alakara, ka akipuruun ekiro kon lo italeuno!

⁴⁸ Kipuroe Ekapolon Akuj, Akuj a Isirael. Epuruutu tokona nakajik! Tolimut ngitunga daang tamasi, “Aamen!” Kipuroe Ekapolon Akuj!