Read turkana Ngieosio 107 Bible Online

Ngieosio 107 - turkana bible

Ngieosio 107

¹ “Tobuakisi Ekapolon Akuj alakara, kainyo ejok ngesi. Erai amina keng akajik!”

²Tolimutu kongina esi lu kiyuu Ekapolon Akuj. Kiyuu alomaagor a ngimoe kus,

³Kitochun anakwapea anagelayek, napei alo kide tanang too napei alokwap tanang kuju.

⁴Awowooto ngiche kech anaroatin a ariet, tongopik erot elooso lore lo elomete.

⁵Tanyam kesi akoro ka akure, tolilimiyosi.

⁶Ani eanyunete ngichan, kikaloikis Ekapolon Akuj. Toyuu ngesi kesi anariaba kech.

⁷Torik kesi alorotin alu itenikina, kitanang lore lo elomete.

⁸Ejoikinit kesi ebuakinete Ekapolon Akuj alakara kotere amina keng na nyedaun, ka ngakiro nakatalarak asubakinea ngesi ngitunga.

⁹Ngulu enyamit akure, itamasi ngakipi toupa. Ani lua akoro, kilelebik ngiboro luajokak.

¹⁰Ebooyete ngiche kech analaireng ka aribu, eenitae a ngiriko toriabas,

¹¹ani angerioto ngakiro a Akuj, kimenyasi ngakitatamet a Akuj ana Epol Noi.

¹²Tobur kesi noi kotere etich loationon, tadakaros tongop ikengarakinan.

¹³Ani eanyunete ngichan, kikaloikis Ekapolon Akuj. Toyuu ngesi kesi anariaba kech.

¹⁴Kipud kesi analaireng ka aribu, tongedengede ngiriko kech.

¹⁵Ejoikinit kesi ebuakinete Ekapolon Akuj alakara kotere amina keng na nyedaun, ka ngakiro nakatalarak asubakinea ngesi ngitunga.

¹⁶Ngidorin lu esubunitae anasuat ananyang, ebwangabwangae ngesi tangaa. Ebilibili ngasua nakapisa.

¹⁷Tabangaaketa ngiche kech taanyut ngichan kotere ngasechesea kech ka aronis kech.

¹⁸Kilele kesi akimuj, tonyout akitu.

¹⁹Ani eanyunete ngichan, kikaloikis Ekapolon Akuj. Toyuu ngesi kesi anariaba kech.

²⁰Kitangalek kesi a akiroit ana adunguni, sodi toyuu alonyas.

²¹Ejoikinit kesi ebuakinete Ekapolon Akuj alakara kotere amina keng na nyedaun, ka ngakiro nakatalarak asubakinea ngesi ngitunga.

²²Ejoikinit ipeyokinete ngesi ngakipeyos a alakara. Tolimosi na asubaki ngesi a ngieosio alu alakara.

²³Adokito ngiche kech ngatubwae naapolok ananam. Taanyut ananam ibore ni eyareta.

²⁴Taanyungasi ngulu dang ngitichisio a Ekapolon Akuj, asubasi ngakiro nakatalarak ananam.

²⁵Kainyo adunguni ngesi akiroit, tokut ekuwam loationon ananam, kitukwu ngitoroi a anam.

²⁶Tokurupupuut ngitoroi kidiama, ani erumor todipaar. Tobul kesi kipirisaar ngitai kotere ngakiro nguna.

²⁷Kibusokinos kesi ileteletasi loger a ngitunga alu irakarit epurot. Tabangaaniasi kesi kimuriak kona itapitapio.

²⁸Ani eanyunete ngichan, kikaloikis Ekapolon Akuj. Toyuu kesi anariaba kech.

²⁹Kisililing ngesi ekuwam, kililinga ngitoroi chek.

³⁰Talakaros kesi ani ajongooto ngitoroi aruore. Kitanang ngesi kesi lodoket lo aloose.

³¹Ejoikinit kesi ebuakinete Ekapolon Akuj alakara kotere amina keng na nyedaun, ka ngakiro nakatalarak asubakinea ngesi ngitunga.

³²Kimiekisi kesi kikuta ngesi alokiriam a ngitunga. Kimiekisi kipuruut ngesi anatuk a ngikasukou.

³³Elochi Ekapolon Akuj ngangololin kitiliwo ariet, ani ngileleae, kitoon deu.

³⁴Akwap naketurupan ngikinyam, kitiliwo edoot, kotere aronis a ngitunga alu alomito neni.

³⁵Elochi ngarieta toliworos ngabwelin, ani akwap nakoonon, toliwor ngileleae.

³⁶Kimiek ngesi lu enyamit akoro elomete inaa. Toduko kesi ere lo elomete.

³⁷Etaate ngamanat ka ngikito a ngimusabib, tolema ngalemet nakaalak.

³⁸Apiari ngesi ngitunga keng toureta ngide lukaalak. Kiatak ngesi ngibaren kech.

³⁹Nasek akidiekotor kesi taraakas lupalag, kotere ni echiakiaritere ka ariaba,

⁴⁰kimenya ngesi ngitunga lu aboliatar kesi kimiek ewowooto anarieta ana emam ngirotin.

⁴¹Nakaneni toyuu lukebootok alochan kech, kimiek ngitunga kech iatakinosi loger a esipanit a ngaanei.

⁴²Eanyungarete lu etenooko ngakiro nguna talakaros, nakaneni isililingio luaronok daang.

⁴³Ani ni eos, kimiek kiira ngakiro nugu. Kimiekisi ngitunga toyena amina a Ekapolon Akuj na nyedaun.