Read turkana Ngieosio 109 Bible Online

Ngieosio 109 - turkana bible

Ngieosio 109

¹(Eeos a Daudi) Kepuruunit ayong iyong Akuj, wara nyiililing!

²Kainyo ngitunga luaronok ka lukengalak, kamatakina ayong kesudioto ngakiro.

³Keruorotor naaronok, katamatakinos emam ibore kech anyamit.

⁴Ketepegete kesi ayong tarai amina ayong kesi, nabo elipakinit.

⁵Kabuanakinete naaronok kotere naajokak kang, karemokino kesi ayong ani aminar kesi.

⁶Toseu ekatubon ngakiro loaronon kirira emoit kang. Kimiek epei a ngimoe keng totubok ngesi ngakiro.

⁷Ani ititakinio ngesi, torukaunae esechit. Ani imaimaa alokies, kimarunae ibore ngini atamar erai akisech keng ache.

⁸ Tokidiekuut ngirwa lu eyarea ngesi. Tolema itwaan iche etich keng!

⁹Tokokiana ngide keng. Toliwor aberu keng apuserut!

¹⁰Towowooto ngide keng ilipanarosi. Kitwarakinae ngide anasakatan a akai kech.

¹¹Itwaan ni imichat ngesi ibore, ejoikinit elemari ngiboro keng daang. Kimiekisi ngitunga lua akwap anache tolemasi ibore ni eanyuni ngesi alotich keng.

¹²Tongop itwaan idodiuni ngisien anikeng, kori tongop itwaan ingarakini ngide keng lukokiok.

¹³Totoaka ngalesea keng daang kimuriakinor ekiro keng analesit ana ngaarei isidiun!

¹⁴Kitamu Ekapolon Akuj aronis kata apaakeng, nyiirimak jik ngasechesea a itiokeng.

¹⁵Kitamu jiik Ekapolon Akuj ngasechesea kech, ani eliworosi kesi ngikulepek, kimuriakinos anakwap!

¹⁶Abu itwaan ngini kimuriak akidodiun ngisien. Nakaneni abu ngesi toboliar lukebootok, ka lu ichanasi ta lu ipirisaara ngitai, tanang tani eari.

¹⁷Amina ngesi akilam ngitunga, kimiekisi ngesi dang kilamae! Peamina ngesi luche epiario. Kotere nguna, tongopik ngesi dang apiaro.

¹⁸Peatubori ngesi ngilam anakituk keng. Kimiekisi ngilam ngulu tolomasi nakwaan keng loger a ngakipi, ka alomar nakoyo keng loger a akimiet!

¹⁹Kimuko ngesi ngilam loger a ngiworui, nabo kiriama ngesi jiik loger a aruba.

²⁰Ekapolon Akuj, kimiek ngimoe kang taanyut nguna. Taanyut ngitunga daang lu keruorotor ayong naaronok!

²¹Wae Ekapolon Akuj, Ekapolon kang, tosubere kare ayong nakijoikinito iyong. Toyuunae ayong ani ejokia amina kon na nyedaun!

²²Keboosit ayong emam kona engarakin. Ewanan etau kang edaudauna.

²³Angopia ayong loger a etorube alo ka ebong. Kakutario ayong loger a ngimases.

²⁴Alilimiyosi ngakungin kang ani engopitor akimuj. Kekar ayong edong ngakoyo make ka ngamunyin.

²⁵ Aliworosi ngitunga kakianatar ayong. Imungimungete ngakies kech kemenyete.

²⁶Ekapolon Akuj na irai Akuj kang, kingarakinae kare. Toyuunae itemem ka amina kon na nyedaun.

²⁷Kitoyen ngimoe kang atamar iyong kiyuununi ayong. Toyena atamar iyong Ekapolon Akuj isubak nguna.

²⁸Kimiek kesi kelam ayong, nakaneni kipiari iyong ayong. Kimiek lu kaboliatar ayong kidwangae,[34] ani ayong ekasuban etich kon, atalakar.

²⁹Kimiek ngimoe kang toting etimoi, kimukokinos ngileech loger a eworu.

³⁰Abuakini Ekapolon Akuj alakara erema. Epuruuni ngesi alokiding asepich a ngitunga,

³¹kainyo eanakini ngesi ekebootonit, sodi toyuu ngesi ani eyakasi lu iriraate ngesi ebalasi taara.