Read turkana Ngieosio 116 Bible Online

Ngieosio 116 - turkana bible

Ngieosio 116

¹Amina ayong Ekapolon Akuj kainyo epupi ngesi ngakiro ka ngakilipasinei kang.

²Ani kona epupio ngesi ngakiro kang, Anyarae ayong ngesi jiik ngirwa lu ayarea.

³Abu akitu katotikokin ayong. Abu ebuloi a aliel katoting. Abu katobul noi atamaran.

⁴Sodi atanyara ayong ekiro a Ekapolon Akuj atama, “Ekapolon Akuj, kemaimai iyong atamar toyuunae ayong!”

⁵Ejok Ekapolon Akuj etenoono. Erai Akuj yok na a ngisien.

⁶Eikinit Ekapolon Akuj lu emenitae. Kayuuni ngesi ayong na ayakar lochan.

⁷Kianga kare etau kang, kainyo kasubea Ekapolon Akuj naajokak.

⁸Kademuni Ekapolon Akuj ayong akitu. Amiatari ngesi ngakiyo anakonyen kang, kigang ngakejen kang nyaadakar.

⁹Alosi ayong alongaren Ekapolon Akuj anakwap alu eyarete.

¹⁰ Abu ayong atorubak anupit tani na alimunio atama, “Epirisaar ayong etau atoana.”

¹¹Tani na aemea ayong atama, “Emam nibe itwaan ni eliwor ni emunoi.”

¹²Nyoni ainakini ayong Ekapolon Akuj, kotere naajokak daang kasubea ayong?

¹³Ayauni akipeyos a emuna nia Ekapolon Akuj, atobuak ngesi alakara ani kayuunea.

¹⁴Etemokini ayong ani a Ekapolon Akuj ngakiro daang na kolong ekongokini. Etemok iteete ngitunga keng daang.

¹⁵Epipilikinit Ekapolon Akuj akitu a itwaan keng.

¹⁶Ee Ekapolon Akuj, arai ayong ekasuban etich kon. Asubi ayong etich kon loger lo asubea itiokang. Kiyuu iyong ayong anakitu.

¹⁷Kalemikini akipeyos a alakara, sodi kelip iyong.

¹⁸Etemokini ayong ani a Ekapolon Akuj ngakiro daang na kolong ekongokini alongaren ngitunga keng daang.

¹⁹Etemokini a alokai a Ekapolon Akuj, alo Yerusalem. Kipuroe Ekapolon Akuj!