Read turkana Ngieosio 118 Bible Online

Ngieosio 118 - turkana bible

Ngieosio 118

¹ Ee, tobuakisi Ekapolon Akuj alakara, kainyo ejok ngesi, nabo erai amina keng na nyedaun akajik.

²Tolimut Ngisirael tamasi, “Erai amina keng na nyedaun akajik.”

³Tolimut ngalesea a Aron tamasi, “Erai amina keng na nyedaun akajik.”

⁴Tolimut daang lu ekerito Akuj tamasi, “Erai amina keng na nyedaun akajik.”

⁵Abu ayong atanyara Ekapolon Akuj na ariabar. Keik ngesi ayong katalachak.

⁶ Kirukit ayong ka Ekapolon Akuj emam ibore akeri. Nyoni kasubakinea ayong itwaan?

⁷Kirukit ayong ka Ekapolon Akuj, kengarakinit. Engolikini ayong ngimoe kang idwangio.

⁸Ejok akigienokin Ekapolon Akuj idwangit akigienokin itwaan.

⁹Ejok akigienokin Ekapolon Akuj idwangit akigienokin ngikapolok.

¹⁰Kerikaunete ayong ngibukui daang, nakaneni enyasu ayong kesi kotere agogongu a Ekapolon Akuj!

¹¹Keriamito ayong alowaitin kadaang, nakaneni enyasu ayong kesi kotere agogongu a Ekapolon Akuj.

¹²Kelulukinosi kesi ayong loger a ao, nakaneni tonomia kesi akim atipei loger a amoni ana ikamuni akim torirau. Kotere agogongu a Ekapolon Akuj, enyasu ayong kesi.

¹³Aponi ketijikin ayong, tonyounoe akidwang, abu Ekapolon Akuj kengarak ayong.

¹⁴ Ekapolon Akuj erai agogongu ka ngikilinga kang. Ngesi alope kayuu ayong.

¹⁵Kiira ngieosio lu edwangeta ngitunga kimariteteete anawiyei a ngitunga a Akuj ebalasi, “Agogongu a Ekapolon Akuj asubaki ngakiro nakatalarak nugu!

¹⁶Agogongu a Akuj kidwangea ngoni ngimoe! Agogongu a Akuj ayau ngakiro nakatalarak nugu!”

¹⁷Nyatoani ayong pearai ayari, atolimorea ngitichisio a Ekapolon Akuj.

¹⁸Kerira ayong Ekapolon Akuj noi, nakaneni nyeisikina ngesi ayong atoani.

¹⁹Tangakinae ayong ngidorin a akai a Akuj. Atolom atobuak Ekapolon Akuj alakara!

²⁰Erai ibore ekidor a Ekapolon Akuj, lu etenooko make itorete lokidor ngolo.

²¹Ee Ekapolon Akuj, kabuakinit iyong alakara ani iirarea ngakiro kang. Kainyo iyong kiyuu ayong.

²² Amoru na kolong angerete ngikadukok ebalasi erono, ngesi tokona aliwor amoru nateno.

²³Ekapolon Akuj asubi nguna. Kingolikinae atamar asubaki nakitalarete!

²⁴Erai akolongit naga na asubaki Ekapolon Akuj, atalakaros emaritetekisi akolongit naga.

²⁵ Ekapolon Akuj, kimaimai sua iyong atamar toyuunae. Ee Ekapolon Akuj, kimaimai sua iyong atamar kitaanyunae sua ajako!

²⁶Epiaritae ni ebuni a ekiro a Ekapolon Akuj! Kigatakinit iyong apiaro na ebuni ani a Ekapolon Akuj.

²⁷Ekapolon Akuj erai Akuj. Erai ngesi na ejok aniyok. Totinga ngakui a nakan kisiakis esukukuu, inyiakanarete tanang naamwar a ekeno a ngakipeyos.

²⁸Irai iyong Akuj kang, kabuakini ayong iyong alakara. Irai iyong Akuj kang, kekusi ayong iyong.

²⁹Tobuakisi Ekapolon Akuj alakara kainyo ejok ngesi, nabo erai amina keng na nyedaun akajik.