Read turkana Ngieosio 119 Bible Online

Ngieosio 119 - turkana bible

Ngieosio 119

¹Epiaritae ngulu emam ibore ichwangakinito lu iwapito etal a Ekapolon Akuj.

²Epiaritae lu irichakinito ngakiro, lu esakete Ekapolon Akuj a ngitai kech kadaang.

³Nyesubete kesi naaronok, nakaneni iwapito ngirotin keng!

⁴Ee Akuj, kitaanyu iyong sua ngitalio kon, sodi kitolimok atamar kiwapa tomunokisi.

⁵Esibit cha kitenikin eboyor kang, ani ewapea ngakitatamet kon!

⁶Ani kerichak ayong ngitalio kon daang, nyekerumete ayong ngileech.

⁷Kepuruuni ayong iyong a etau alo ikiuna na etatamar ngakiro kon natenoyek.

⁸Ewapi ayong ngakitatamet kon, nyikiisik kare ayong!

⁹Ikokini esorokit echoikini eboyor keng toliwor lo ikiuna ai? Echoikini erai kiwap ngitalio kon.

¹⁰Erichakina ayong akisub etich kon a etau kang kadaang. Kiratakinae nyaanger ngitalio kon.

¹¹Erichakinit ayong etal kon alotau kang, nyakasubakinea iyong akisech.

¹²Ee Ekapolon Akuj, kepuruunit iyong. Kitatamae ayong ngirotin kon.

¹³Alimuni ayong a angajep kang ngakiro daang na kolong idunguni iyong.

¹⁴Amina ayong akiwapit ngakiro kon akidwang aanyun ebari lokaalan.

¹⁵Eseme ayong ngitalio kon. Etebeik ngakonyen kang lorotin kon.

¹⁶Amina ayong ngakitatamet kon. Nyekemuriakini akiroit kon.

¹⁷Tosubea ekasuban etich kon naajokak, atoyarea ka akiwap akiroit kon.

¹⁸Tangaa ngakonyen kang, ataanyungarea ngakiro nakatalarak a etal kon.

¹⁹Arai ayong ekaloton anakwap kana. Nyikidaa ngitalio kon.

²⁰Eriebi etau kang ekimue lo esakea akiyen ngakiro kon jiik.

²¹Ikilanakini iyong lu inisasi. Ilamam lu nyiwapito ngitalio kon.

²²Nyikitaanyu ayong ngiyeny ka ngimeny, kainyo erichak ayong ngakiro kon.

²³Tani katukuotor ayong ngikapolok, etamanari ayong ekasuban etich kon ngakitatamet kon.

²⁴Ketalakarito ayong ngakiro kon, kesi ketoosunete.

²⁵Edikino ayong atoani. Kisikwarunae itemem ka akiroit kon.

²⁶Alimo ayong na asub daang, kiik iyong ngakiro kang. Kitatamae ayong ngakitatamet kon.

²⁷Kitatamae eger lo ewapea ngitalio kon, sodi etamana ayong ngitichisio kon lukatalarak.

²⁸Alilimiyo etau kang ani ealolongio. Kitogogongoi loger lo kolong kichikakinitor.

²⁹Tachada alioko anikang, kitatam etal kon ani ijokia iyong.

³⁰Aseu ayong erot lokamunor iyong, erichak ngakiro kon.

³¹Ee Ekapolon Akuj, erichak ayong ngakiro kon. Nyikimiek ayong kesurumio ngileech!

³²Ewapi ayong ngitalio kon, kainyo kitoosu iyong ayong noi.

³³Ee Ekapolon Akuj, kitatamae eger a ngakitatamet kon, sodi erichak ayong jik.

³⁴Kitoyenae ayong etal kon, minio kona erichakinea. Erichakini ayong a etau kang kadaang.

³⁵Torikoe ayong erichak ngitalio kon, kainyo aanyunit ayong alakara anikech.

³⁶Nak etau kang ekimue lo erichakinea ngakiro kon, meere kotere angatarea ichebore.

³⁷Toree ngakonyen kang nyiiteto eboyor lopasit. Torikoe ataanyunea akiyar alorotin kon.

³⁸Kiyook akichikakinet kon ani a ekasuban etich kon. Akichikakinet ngina ngesi na ichikakini iyong ngulu kiminasi iyong.

³⁹Toyuunae ayong aloyeny alu aemit ayong, kotere ejokak ngakiro kon.

⁴⁰Asaki ayong akiwap ngitalio kon, lu kitaanyunea eboyor lokitetet, kainyo irai iyong lo itenoono.

⁴¹Ekapolon Akuj, kidodikinae amina kon na nyedaun. Toyuunae itemem ka akichikakinet kon.

⁴²Minio ayong kona atachea ngakiro alu keyenyete, kainyo anupit ayong akiroit kon.

⁴³Kingarakinae toliwor eruoro ngakiro kon na iteni jiik, kainyo ngakiro kon egieno ayong.

⁴⁴Ewapi ayong etal kon jiik, napei tokona jik.

⁴⁵Eboikin ayong arai lo alachikina dir, ani ationikinitor akiwap ngitalio kon.

⁴⁶Alimokini ayong ngikapolok ngakiro kon, nyekerumeta ngileech.

⁴⁷Kajoikinit ayong akiwapit ngitalio kon, kainyo amina ayong kesi.

⁴⁸Akerit ayong ngitalio kon atomina. Etamanari ayong ngakitatamet kon.

⁴⁹Kitamu akichikakinet kon anikang a ekasuban etich kon, ketaanyu akichikakinet ngina ibore ni egieno.

⁵⁰Tani kaanyunit ngichan kesiangaritae, kainyo ketaanyuni akichikakinet kon akiyar.

⁵¹Ngitunga lukenisak, kemenyete ayong jiik. Nakaneni nyadepari ayong etal kon.

⁵²Na etamunea ayong ngakiro kon na kolong ngorok, kesiengunete ayong, Ekapolon Akuj.

⁵³Angoyeene ayong elelebun, na engolikinea luaronok ichwangakinete etal kon.

⁵⁴Ngirwa lu apeyonitor anakwap kana, aeo ngieosio a ngakitatamet kon.

⁵⁵Ketamuununi ayong iyong nakwaare, Ekapolon Akuj, erichakinite ngitalio kon.

⁵⁶Ibore ni ketalakarit ayong noi, ngesi ni anupitor ngitalio kon.

⁵⁷Ee Ekapolon Akuj, iyong bon kasakit ayong. Kechikakinit atamar ewapi ngakiro kon.

⁵⁸Kelipit iyong a etau kang kadaang atamar, pena iyong ngisien anikang, loger lo kichikakinitor!

⁵⁹Etamana ayong elote kang, abongu tokona akiwap ngakiro kon.

⁶⁰Ebunyakini ayong nyamamakini akiwap ngitalio kon.

⁶¹Kalokito ayong luaronok, nakaneni nyekemuriakini ayong etal kon.

⁶²Anyouni ayong kiding akwaar kepuruu iyong, kotere ngakiro kon na etenooko.

⁶³Kielo ayong ka daang lu kikerito iyong ka daang lu irichakinito ngitalio kon.

⁶⁴Ee Ekapolon Akuj, ileleba amina kon na nyedaun akwap wadaang. Kitatamae ngitalio kon.

⁶⁵Ee Ekapolon Akuj, kisubea iyong ayong ekasuban etich kon naajokak, loger lo kichikakinea.

⁶⁶Kitatamae aosou ka etube ngakiro, kainyo anupit ayong ngitalio kon.

⁶⁷Ani eringa ayong nyirira, abu atosech, nakaneni erichak tokona akiroit kon.

⁶⁸Ijok iyong nabo ipatana! Kitatamae ngitalio kon.

⁶⁹Ngulu inisasi, kesudioto ayong ngakiro. Nakaneni erichakinit ayong ngitalio kon a etau kang kadaang.

⁷⁰Edikam ngakies kech. Ani eliwor ayong, kajoikinit etal kon.

⁷¹Ajok eriras kon anikang, kainyo abu ketaanyu ayong ngakitatamet kon.

⁷²Etal lo kitaanyu iyong ayong, kajoikinit ayong noi, akidwang ngaropiyae daang anakwap.

⁷³Kisub iyong ayong a ngakan kon a ilope. Kitoosunoe ayong atoyen ngitalio kon.

⁷⁴Ngulu kikerito iyong, kengolikinete ayong talakaros, ani egienor ayong akiroit kon.

⁷⁵Ee Ekapolon Akuj, ayeni ayong atamar etenooko ngakiro na itubuni iyong. Ayeni nabo dang atamar kirira iyong ayong ani iraakar lo kimunoi.

⁷⁶Kimiek amina kon na nyedaun toliwor ngesi kesililingi ayong, loger lo kichikakinea iyong ayong lo arai ekasuban etich kon.

⁷⁷Kimiek ngisien kon pena nikang, minio kona ayarea. Kainyo ketalakarit ayong etal kon.

⁷⁸Kimiek lu nyekerito Akuj kiruma ngileech, kainyo kamodito ayong. Ani eliwor ayong, etamanari ngitalio kon.

⁷⁹Kimiek lukenisak daang toreeunos nikang toyeneta kesi ngakiro kon.

⁸⁰Agasi atamar kikiun etau kang anakitatamet kon, sodi nyekedwang ataanyu ngileech.

⁸¹Ekapolon Akuj, kaburu ayong lokojokon, kedarit iyong kitoyuu ayong. Egieno ayong akiroit kon.

⁸²Aburu ngakonyen kang angolengol ibore ni ichikakini iyong. Engita ayong abala, “Ibuni iyong ori akisililing ayong?”

⁸³Ekok ayong akutwam nangorot na enoonokino. Tani kekoni neni, eringa ayong nyimuriakina ngakitatamet kon.

⁸⁴Edari ayong tanang wori? Ori iriraa iyong lu kaboliatar ayong?

⁸⁵Ngitunga lukenisak, aboka ngapanya nakalokitotor ayong. Nyemisito ngitunga ngulu etal kon.

⁸⁶Eraakasi ngitalio kon daang lua iteni. Kaboliatar kesi ayong kesudonokinete ngakiro, kingarakinae kare!

⁸⁷Edikino kesi kaarete ayong, nakaneni nyeisikina ayong ngitalio kon.

⁸⁸Kotere amina kon na nyedaun, tosubere ayong naajokak, ewapea ngakiro kon.

⁸⁹Ee Ekapolon Akuj, erubi akiroit kon jik. Erai na nyesaluni anadis.

⁹⁰Erubi ajokis kon analesea kadaang. Itowei kolong iyong akwap, nakaneni eringa erubakinit ewei.

⁹¹Ewaasi ngiborei daang akolongit naga a akiroit ana kolong idunguni iyong. Kainyo eraakasi daang ngikasubak etich kon.

⁹²Arai nyeerai etal kon ketalakarit ayong, kadauna ayong kotere ngichan kang.

⁹³Nyekemuriakinete ngakitatamet kon jik kesi kitaanyunitor iyong ayong akiyar.

⁹⁴Arai ayong ikon, toyuunae, ani erichar akiwap ngitalio kon.

⁹⁵Kedarito ayong ngitunga luaronok esakete akiar, nakaneni etamanari ayong ngakiro kon.

⁹⁶Ayen atamar eyei ibore daang esal, nakaneni emam etal kon esal.

⁹⁷Amina ayong etal kon noi! Etamanari ayong jiik akolongit daang etia ni etia!

⁹⁸Kirukit ayong ka etal kon jiik, ketoosu ayong akidwang ngimoe kang.

⁹⁹Aosu ayong noi edwang ngiketatamak kang, kainyo etamanari ayong ngakiro kon.

¹⁰⁰Aosu ayong noi edwang ngikasukou, ani ewapitor ngitalio kon.

¹⁰¹Anger ayong akiwap elote loaronon daang, erichakinea akiroit kon.

¹⁰²Nyilagalagakina ayong ngakiro kon, kainyo iyong elope irai eketataman kang.

¹⁰³Ebobok ngakitatamet kon anikang eunyiunyete. Ee robo, ebobok noi idwangito tani akimiet a ao anakituk kang.

¹⁰⁴Aanyuni ayong aosou anakitatamet kon, kotere ngakiro nguna, aremokino ayong elote loaronon daang.

¹⁰⁵Erai akiroit kon ataa a ngakejen kang, nabo erai akicha a erot kang.

¹⁰⁶Ekong ayong nabo aweikinit akikong ngina abala ewapi ngakiro kon na etenooko.

¹⁰⁷Ee Ekapolon Akuj, ariaba ayong lokojokon. Kiteyarae ayong loger lo ilimunio iyong.

¹⁰⁸Ee Ekapolon Akuj, tacham akilip na kabuakinitor iyong alakara. Kitatamae ayong ngitalio kon.

¹⁰⁹Ajalit ayong akiyar kang jiik. Nakaneni nyimuriakina ayong etal kon.

¹¹⁰Kalokito ayong ngitunga luaronok, nakaneni nyibatara ayong alotalio kon.

¹¹¹Ngakiro kon eraakasi ebari kang lokajik. Ee robo, kesi italakarito etau kang.

¹¹²Atiaku ayong akiwap ngakitatamet kon, tanang akolongit na atoanea.

¹¹³Aremokino ayong ngitunga lu etiakito ngitai ngaarei. Nakaneni amina etal kon.

¹¹⁴Iyong irai aduket kang ka aupwal kang. Egieno ayong akiroit kon.

¹¹⁵Kiyotosi anikang, esi ngikasechak. Ewapi ayong ngitalio a Akuj kang.

¹¹⁶Kitogogongoi loger lo kolong kichikakinitor, sodi atoyar. Nyikimiek ayong aanyuni ngileech kotere ngakiro na egieno ayong.

¹¹⁷Kigangae ayong eboikinor akaalimon. Toliwor arima jiik ngakitatamet kon.

¹¹⁸Ingerit iyong ngitunga daang lu nyiwapito ngakitatamet kon. Ee robo, erai amodeanut kech aka pas.

¹¹⁹Itusubunit iyong luaronok daang asakatan. Kotere ngakiro nguna, amina ayong ngakiro kon.

¹²⁰Emarani akwaan kang ani kaemitor iyong. Kabul ayong kotere ngakiro na idunguni iyong.

¹²¹Asub ayong na eriyan kiyookino. Nyikimiekinea ayong ngitunga lukechiakiarito.

¹²²Kichikakinae atamar kingarakini iyong ayong. Nyiimiek lu nyikikerito iyong kechiakiarete!

¹²³Aburu ngakonyen kang angolengol, edarit atamar kitoyuu. Edarit atamar kiyook natenoyek na kolong kichikakini.

¹²⁴Tosubere ayong ekasuban etich kon, na itemokino namina kon na nyedaun. Kitatamae ayong ngitalio kon.

¹²⁵Arai ayong ekasuban etich kon, kitoosunoe atoyen ngakiro kon.

¹²⁶Ee Ekapolon Akuj, itemokino tokona iyong isubakini ibore idio, kainyo echwangakis ngitunga etal kon.

¹²⁷Amina ayong ngitalio kon akidwang egolit, ee robo, akidwang tani egolit loajokon noi.

¹²⁸Kotere nguna, ewapit ayong ngakitatamet kon daang. Aremokino erot lo amodeanut daang.

¹²⁹Eraakasi ngakiro kon nakitalarete. Irichakinit etau kang kesi.

¹³⁰Ngakiro na elimunitoe anakitatamet kon, eyaunito akicha. Itoosunete lu emam ibore eyenete.

¹³¹Achiit ayong akituk eanga, kainyo kemuit akikamun ngitalio kon.

¹³²Toreeun nikang, pena ngisien anikang, loger lo kisienitotor daang lu kiminasi iyong.

¹³³Kitenik elote kang, loger lo kichikakinea iyong ayong. Wara naaronok nyakadokakis ayong.

¹³⁴Toyuunae ani eyakasi lu kechiakiarito. Sodi ewapea ayong ngitalio kon.

¹³⁵Kimiek ereet kon kinwaku ekasuban etich kon. Kitatamae ayong ngitalio kon.

¹³⁶Elakakinito ngakonyen kang ngakiyo eleleete loger a angolol, kotere ni nyiwapitotor ngitunga etal kon.

¹³⁷Ee Ekapolon Akuj, itenoono iyong. Iyookino ngakiro na itubuni iyong.

¹³⁸Ngakiro na iwaakinit iyong eteniyete nabo itemokino.

¹³⁹Angoit ayong eleleba ani nyemisitotor ngimoe kang ngakiro kon.

¹⁴⁰Eraakasi ngakichikakinet kon na ikiuna dir. Amina ayong ekasuban etich kon kesi.

¹⁴¹Adit ayong nabo kemenyaritae, nakaneni nyelagalagakinit ngitalio kon.

¹⁴²Erubi ateneanut kon jik. Erai etal kon eka iteni.

¹⁴³Ariaba ayong noi ayei lochan. Ketaanyunito ayong ngitalio kon alakara.

¹⁴⁴Eraakasi ngakiro kon na eteniyete jik. Kitaanyunae ayong aosou atoyarea.

¹⁴⁵Kegoronokini ayong iyong a etau kang kadaang. Ekapolon Akuj, kiira ngakiro kang, ewapea ayong ngakitatamet kon.

¹⁴⁶Kanyarit ayong iyong. Toyuunae erichakinea ngakiro kon.

¹⁴⁷Nataparach eringa akolong nyipiripiruna, anyouni ayong katanyar iyong asaki kingarak. Egieno ayong akiroit kon lokojokon.

¹⁴⁸Akwaar daang kiiya, akienyi ayong, etamanari ngakitatamet kon.

¹⁴⁹Kiira ngakiro kang, itemem ka amina kon na nyedaun. Kidodiu ngisien kon, kitoyuu ayong!

¹⁵⁰Aapuut lukamoitanak kaboliatar ayong. Eraakasi kesi lu eloka alotal kon.

¹⁵¹Nakaneni iapi iyong anikang, Ekapolon Akuj, nabo eraakasi ngitalio kon daang lua iteni.

¹⁵²Napei kolong kanuan, etatama ayong ngakiro kon. Iwaak iyong kesi pena jik.

¹⁵³Kingolik ngichan kang kitoyuu, kainyo nyilagalagakina ayong etal kon.

¹⁵⁴Toweikinae ayong kitalachak. Toyuunae loger lo kichikakini iyong ayong.

¹⁵⁵Elonikina ayuuno ka luaronok, kainyo nyesakete akiwap ngakitatamet kon.

¹⁵⁶Ee Ekapolon Akuj, etioko ngisien kon. Kidodiu ngisien kon kitoyuu ayong.

¹⁵⁷Elalak ngimoe kang ka lu kechiakiarito ayong, nakaneni nyalakakini ayong ngakiro kon.

¹⁵⁸Kakadakinito ngirukooi ngulu na engolikinea, kainyo nyirichakinito kesi ngitalio kon.

¹⁵⁹Ee Ekapolon Akuj, kingolik eger lo aminar ayong ngitalio kon. Kirichak akiyar kang kotere amina kon na nyedaun.

¹⁶⁰Iteni erai epit a etal kon. Etenooko ngakiro kon, eraakasi daang na erubete jik.

¹⁶¹Kaboliatar ngikapolok pas nakaneni akerit ayong ngakiro kon.

¹⁶²Alakara kotere akiroit kon, ekoni itwaan ni angata ebari.

¹⁶³Aremokino ayong alioko lokojokon, nakaneni amina etal kon.

¹⁶⁴Kepuruunit iyong ngakipuruunet ngakan-kaarei akolongit apei, kotere ngakiro kon na etenooko.

¹⁶⁵Ibooyete lu eminasi etal kon nikaalimon. Emam ibore ilegeuni kesi.

¹⁶⁶Ee Ekapolon Akuj, kedarit iyong kitoyuu ayong. Etemokinit ayong ngitalio kon.

¹⁶⁷Ewapit ayong ngakiro kon. Amina ayong a etau kang kadaang.

¹⁶⁸Ewapit ngitalio ka ngakiro kon. Itee iyong daang na asubi ayong.

¹⁶⁹Ee Ekapolon Akuj, kimiek akigoro kang tanangu nikon! Kitaanyunae aosou loger lo kichikakinea iyong.

¹⁷⁰Topupok akilip kang, toyuunae itemem ka akichikakinet kon.

¹⁷¹Kepuruuni ayong iyong jiik, kainyo kitatami iyong ayong ngitalio kon.

¹⁷²Aeokini ayong ngakiro a etal kon, kainyo iyookino ngitalio kon daang.

¹⁷³Tasak akingaranakin ayong jiik, kainyo ewapit ayong ngakitatamet kon.

¹⁷⁴Ee Ekapolon Akuj, eitanit ayong noi atamar kitoyuu iyong. Ketalakarit ayong etal kon.

¹⁷⁵Kiteyarae ayong, kepuruunio iyong. Kimiek ngakiro kon kengarakis ayong.

¹⁷⁶Erimit ayong akwap loger a amesek ana echakara. Bua tasakae ayong ekasuban etich kon, kainyo nyilagalagakina ayong ngitalio kon.