Read turkana Ngieosio 135 Bible Online

Ngieosio 135 - turkana bible

Ngieosio 135

¹Ekapolon Akuj kipuroe! Kipuruutu Ekapolon Akuj. Kipuruutu, esi ngikasubak etich keng,

²lu iwaasi alokai a Ekapolon Akuj, alokai a Akuj yok.

³Kipuruutu Ekapolon Akuj, kainyo ejok ngesi. Toeokisi ipuruunito ekiro keng kainyo ejok ikokinio neni.[36]

⁴Kainyo aseu Ekapolon Akuj Yakobo toliwor ekeng, aseu Ngisirael toliworos ngikeng a ilope.

⁵Ayeni ayong iteni dir atamar epolot Ekapolon Akuj. Ee robo, epolot Ekapolon Akuj yok idwangit ngakujo daang.

⁶Esubi Ekapolon Akuj ibore ni esaki ngesi, anadis ka akwap, ananamea ka nituluk daang.

⁷Eyaununi ngidowon anasalunet a akwap. Imoriununi akiru ka akimilea. Itukutuni ekuwam alodulae.

⁸Aari ngesi ngiuriuna lu ekingaren daang alo Misiri, ngiuriuna lu ekingaren a ngitunga ka ngibaren.

⁹Asubi ngesi ngakitoodikinet nakailiilok ka nakatalarak, kirira Parao ka ngikasubak etich keng daang.

¹⁰Amunyari ngesi ngibukui lukaalak sodi taar ngikapolok lu eyenikinitae,

¹¹kesi ta Sion, lo arai ekapolon a Ngiamor, ka Ogu, lo arai ekapolon a Bachan, ta ngikapolok daang alo Kanaan.

¹²Alemari ngesi akwap kech nak ngitunga keng, nak Ngisirael toliwor akwap kech.

¹³Ekapolon Akuj, kilimorio iyong atamar irai Akuj jik. Kitamunete iyong nganaketa daang.

¹⁴ Eikini Ekapolon Akuj ngitunga keng. Isieniyete ngikasubak etich keng.

¹⁵Esubunitae ngakujo a ngibukui anakwangae ka egolit, na esubete ngakan a ngitunga.

¹⁶Eyakasi kesi ngakituk, nakaneni nyiruorikinete. Eyakasi ngakonyen, nakaneni nyiteete.

¹⁷Eyakasi ngaki, nakaneni nyepupete. Nyepedorete tani akiangakin.

¹⁸Ngulu asubete kesi kigienokinos, kimiekisi kikwaanikin[37] ka ngakujo na asubete kesi nguna!

¹⁹Kipuruutu Ekapolon Akuj, Ngisirael! Kipuruutu ngesi, esi ngimurok a Akuj!

²⁰Kipuruutu Ekapolon Akuj, esi Ngilawi. Kipuruutu ngesi, esi lu ikerito Ekapolon Akuj.

²¹Kipuruunoe Ekapolon Akuj alo Sion. Kipuruunoe alo Yerusalem, ani erai awi keng. Kipuroe Ekapolon Akuj!