Read turkana Ngieosio 139 Bible Online

Ngieosio 139 - turkana bible

Ngieosio 139

¹(Eeos a Daudi) Ee Ekapolon Akuj, kiseme iyong ayong kiyen.

²Keboikin kori kawo, iyeni iyong. Iyeni ibore ni etami ayong.

³Esaa lo asubea ayong etich kori lo eangaritor kitee iyong ayong. Iyeni iyong elote kang daang.

⁴Tani eringa akiroit nyitoruno nakituk kang, iberakin iyong akiyen ibore ni alimuni ayong.

⁵Ibeit iyong lowaitin kang daang. Kiikini iyong ayong a agogongu kon.

⁶Kationikinit ayong aosou kon noi. Nyayeni ayong atamar ekokini aanyuni ai!

⁷Aliwae amatar ayong kelany iyong? Aliwae alosi atojongo akitere iyong?

⁸Ani kalot nadis, iyei iyong inaa. Ani kenapakin lokatoak, iyei iyong inaa.

⁹Ani kaporo atanang ni ipiripirunea akolong, kori atanang logerio a anam,

¹⁰kiriki iyong ayong tani kaina. Kingarakini iyong ayong kaina.

¹¹Apedori ayong alimokin aribu atamar katarap ayong kori kilochoi akicha nakeriamit ayong toliwor aribu.

¹²Tani aribu anikon, nyerai aribu. Ani akwaar, ekwang loger a apaaran. Anikon, erai aribu ka akicha ngipei.

¹³Isubuni iyong akwaan kang ka etau. Kirumeikini kolong iyong ayong anakook a itiokang.

¹⁴Kepuruunit ayong iyong kainyo irai iyong nakitubuli, tarai nakatalaran. Kitalarete na isubi iyong. Ayeni ayong nguna a etau kang kadaang.

¹⁵Nakolong asubere ngakoyo kang, na erumeanakinere anakook a itiokang, kolong eyosi ayong akingaarikin, emam itwaan ayeni, pearai iyeni iyong atamar ayei ayong neni.

¹⁶Kingolikini kolong iyong ayong eringa nyidouno. Igiri iyong ibore daang nakitab kon. Igiri iyong ngirwa kang daang, eringa tani akolongit na ekingaren nyimarakina.

¹⁷Ee Akuj, kajoikinito ayong ngitamen kon noi. Emam tani kona imarunio.

¹⁸Arai toyei kona imarunio, kelalak noi akidwang asinyen. Na akienyunea ayong, eringa kirukit ka iyong.

¹⁹Ee Akuj, esibit cha taar iyong luaronok. Esibit cha kiyotokis ngikaarak ngulu anikang.

²⁰Keruorotor kesi ayong ngakiro naaronok. Iruorotor ekiro kon ngakiro naaronok.

²¹Ee Ekapolon Akuj, aremokino ayong ngulu kiremokino iyong. Emenyarit ayong ngulu kingerito iyong.

²²Aremokino ayong kesi nakationon. Emarunit ayong kesi atamar eraakasi ngimoe kang.

²³Ee Akuj, kisemoi ayong, toyen etau kang, toroae, toyen ngitamen kang.

²⁴Tongichu keyei ibore erono anikang. Kitorik ayong alorot alo erai eka jik.